തിരുവനന്തപുരം: കോർപ്പറേഷൻ തെരഞ്ഞെടുപ്പിൽ ബിജെപി നേടിയ വിജയത്തെ അഭിനന്ദിച്ച് കോൺഗ്രസ് എംപി ശശി തരൂർ രംഗത്തെത്തി. തലസ്ഥാന നഗരിയിലെ ബിജെപിയുടെ ഈ ചരിത്രപരമായ പ്രകടനം ഒരു നിർണായക രാഷ്ട്രീയ മാറ്റമാണ് സൂചിപ്പിക്കുന്നതെന്ന് അദ്ദേഹം അഭിപ്രായപ്പെട്ടു.താൻ നിരന്തരമായി എൽഡിഎഫ് ഭരണത്തിന്റെ ദുർഭരണത്തിനെതിരെ പ്രചാരണം നടത്തിയിരുന്നുവെങ്കിലും, ജനങ്ങൾ മറ്റൊരു രാഷ്ട്രീയ പാർട്ടിയെയാണ് തിരഞ്ഞെടുപ്പിലൂടെ പിന്തുണച്ചതെന്ന് തരൂർ വ്യക്തമാക്കി.
തദ്ദേശ സ്വയംഭരണ തിരഞ്ഞെടുപ്പിൽ യുഡിഎഫ് കാഴ്ചവെച്ച പ്രകടനത്തെയും ശശി തരൂർ എംപി അഭിനന്ദിച്ചു. ഈ തിരഞ്ഞെടുപ്പ് ഫലം വരാനിരിക്കുന്ന നിയമസഭാ തിരഞ്ഞെടുപ്പിനുള്ള ഒരു വലിയ സൂചനയാണ് നൽകുന്നത്. കഠിനാധ്വാനം, കൃത്യമായ പ്രചാരണം, ഭരണവിരുദ്ധ വികാരം എന്നിവ ഫലത്തിൽ പ്രതിഫലിച്ചു. 2020-ലെ തിരഞ്ഞെടുപ്പിനെക്കാൾ മെച്ചപ്പെട്ട ഫലമാണ് ഇത്തവണ യുഡിഎഫിന് ലഭിച്ചത്.കേരളത്തിന്റെ വികസനത്തിനും പുരോഗതിക്കുമായി തുടർന്നും പ്രയത്നിക്കുമെന്നും മികച്ച ഭരണത്തിനായി നിലകൊള്ളുമെന്നും അദ്ദേഹം കൂട്ടിച്ചേർത്തു.
