തിരുവനന്തപുരം: സിപിഎം കേന്ദ്ര കമ്മിറ്റി അംഗവും മുൻ മന്ത്രിയുമായ പി. രാജീവിനെ P RAJEEV എൽഡിഎഫ് കൺവീനർ സ്ഥാനത്തേക്ക് പരിഗണിക്കുന്നതായി സൂചന. നിലവിലെ കൺവീനർ ടി.പി. രാമകൃഷ്ണൻ സ്ഥാനമൊഴിയാൻ താൽപര്യം പ്രകടിപ്പിച്ചതായാണ് റിപ്പോർട്ടുകൾ.
മുന്നണിയുടെ യുവമുഖങ്ങളിലൊരാളായ പി. രാജീവ് മന്ത്രി എന്ന നിലയിൽ കാഴ്ചവെച്ച പ്രകടനവും പൊതുസ്വീകാര്യതയും പരിഗണിച്ചാണ് അദ്ദേഹത്തിന്റെ പേര് സജീവ ചർച്ചയാകുന്നത്. മുന്നണി സംഘടനാ പ്രവർത്തനങ്ങൾക്ക് പുതിയ ഊർജം നൽകാൻ കഴിയുന്ന നേതാവെന്ന വിലയിരുത്തലും പാർട്ടിക്കുള്ളിലുണ്ട്.
കഴിഞ്ഞ നിയമസഭാ തിരഞ്ഞെടുപ്പിലെ തിരിച്ചടിക്ക് പിന്നാലെ പാർട്ടിയുടെ രാഷ്ട്രീയ സമീപനങ്ങളെക്കുറിച്ച് തുറന്ന അഭിപ്രായപ്രകടനം നടത്തിയ നേതാക്കളിൽ ഒരാളായിരുന്നു പി. രാജീവ്. തിരഞ്ഞെടുപ്പ് പ്രചാരണത്തിൽ ഉയർത്തിയ ചില മുദ്രാവാക്യങ്ങൾ പ്രതീക്ഷിച്ച ഫലം നൽകിയില്ലെന്നും പാർട്ടിക്ക് പുതിയ സമര-രാഷ്ട്രീയ രീതികൾ ആവശ്യമാണെന്നും അദ്ദേഹം ചൂണ്ടിക്കാട്ടിയിരുന്നു.
മന്ത്രിയായിരിക്കെ മികച്ച പ്രവർത്തനം കാഴ്ചവെച്ച രാജീവിനെ കൂടുതൽ നിർണായക നേതൃത്വ ചുമതലകളിലേക്ക് കൊണ്ടുവരണമെന്ന ചർച്ചകൾക്കിടയിലാണ് എൽഡിഎഫ് കൺവീനർ സ്ഥാനത്തേക്ക് അദ്ദേഹത്തെ പരിഗണിക്കുന്നുവെന്ന വാർത്തകൾ പുറത്തുവരുന്നത്. എന്നാൽ ഇക്കാര്യത്തിൽ ഔദ്യോഗിക സ്ഥിരീകരണം ഉണ്ടായിട്ടില്ല.