കണ്ണൂർ: കെഎസ്യു പ്രതിഷേധത്തിനിടെ ആരോഗ്യമന്ത്രി വീണാ ജോർജിന് പരിക്കേറ്റു. കൈക്കും കഴുത്തിനുമാണ് പരിക്ക്. മന്ത്രി കണ്ണൂർ ജില്ലാ ആശുപത്രിയിൽ ചികിത്സ തേടി; ആവശ്യമായാൽ ഐസിയുവിലേക്ക് മാറ്റുമെന്ന് അധികൃതർ അറിയിച്ചു. ജില്ലയിലെ പരിപാടി കഴിഞ്ഞ് മടങ്ങുന്നതിനിടെ റെയിൽവേ സ്റ്റേഷന്റെ ഒന്നാം പ്ലാറ്റ്ഫോമിലുണ്ടായ കരിങ്കൊടി പ്രതിഷേധത്തിനിടെയാണ് സംഭവം. സ്ഥലത്ത് മന്ത്രിയും പ്രതിഷേധക്കാരും തമ്മിൽ വാക്കേറ്റവും ഉണ്ടായി.
മുഖ്യമന്ത്രി പിണറായി വിജയൻ ആശുപത്രിയിലെത്തി മന്ത്രിയെ കാണും. മന്ത്രിയെ കയ്യേറ്റം ചെയ്യുന്നത് അപലപിക്കേണ്ട പ്രവണതയാണെന്നും ഇത് ജനാധിപത്യത്തിന് യോജിച്ചതല്ലെന്നും സ്പീക്കർ എ.എൻ. ഷംസീർ പ്രതികരിച്ചു. കോൺഗ്രസ് നേതൃത്വം ആശുപത്രിയിലെത്തി ക്ഷമ ചോദിക്കണമെന്നും അദ്ദേഹം ആവശ്യപ്പെട്ടു. മന്ത്രിമാരെ തെരുവിൽ കൈകാര്യം ചെയ്യുന്ന സംഭവം സംസ്ഥാനത്ത് ആദ്യമാണെന്നും വിഷയത്തിൽ പ്രതിപക്ഷം നിയന്ത്രണം പുലർത്തണമെന്നും അദ്ദേഹം കൂട്ടിച്ചേർത്തു.
സംഭവം വളരെ മോശമാണെന്ന് മുൻ ആരോഗ്യമന്ത്രി കൂടിയായ സിപിഐഎം നേതാവ് കെ.കെ. ശൈലജ പറഞ്ഞു. പ്രതീകാത്മക പ്രതിഷേധങ്ങൾ സാധാരണമാണ്, എന്നാൽ ഇത് ശാരീരിക ആക്രമണമാണെന്നും കേരളത്തിന്റെ ജനാധിപത്യ ബോധത്തിന് നേരെയുള്ള ആക്രമണമാണെന്നും അവർ വ്യക്തമാക്കി.