കണ്ണൂർ: നിയമസഭാ തെരഞ്ഞെടുപ്പിൽ പേരാവൂരിൽ നിന്ന് CPI(M) സ്ഥാനാർത്ഥിയായി മുൻ മന്ത്രി കെ കെ ശൈലജ മത്സരിക്കും. ജില്ലാ സെക്രട്ടേറിയറ്റ് യോഗത്തിലാണ് തീരുമാനം. നിലവിലെ മണ്ഡലമായ മട്ടന്നൂരിന് പകരമാണ് ശൈലജയെ പേരാവൂരിൽ ഇറക്കുന്നത്. മട്ടന്നൂരിൽ ഡിവൈഎഫ്ഐ സംസ്ഥാന സെക്രട്ടറി വി.കെ. സനോജ് മത്സരിക്കും.
സണ്ണി ജോസഫ് കഴിഞ്ഞ മൂന്ന് തവണയും വിജയിച്ച മണ്ഡലമാണ് പേരാവൂർ. Indian National Congress നേതാവായ സണ്ണി ജോസഫ് വീണ്ടും യുഡിഎഫ് സ്ഥാനാർത്ഥിയാകുമെന്ന സൂചനയുണ്ട്. യുഡിഎഫിന്റെ കോട്ടയായി കണക്കാക്കുന്ന മണ്ഡലം ജനകീയ പ്രതിച്ഛായയുള്ള ശൈലജയെ ഇറക്കി തിരിച്ചുപിടിക്കാനാണ് ഇടതുപക്ഷത്തിന്റെ നീക്കം. 2006ൽ പേരാവൂരിൽ നിന്ന് വിജയിച്ച ശൈലജ 2011ൽ സണ്ണി ജോസഫിനോട് പരാജയപ്പെട്ടിരുന്നു. ഇക്കുറി ഇരുവരും വീണ്ടും നേർക്കുനേർ വന്നാൽ കടുത്ത മത്സരത്തിനായിരിക്കും മണ്ഡലം സാക്ഷ്യംവഹിക്കുക.
അതേസമയം, തളിപ്പറമ്പ് മണ്ഡലത്തിൽ ആന്തൂർ നഗരസഭ മുൻ അധ്യക്ഷയും എം വി ഗോവിന്ദൻയുടെ ഭാര്യയുമായ പി.കെ. ശ്യാമള മത്സരിക്കും. നിലവിലെ തളിപ്പറമ്പ് എംഎൽഎയായ എം.വി. ഗോവിന്ദൻ പാർട്ടി സംസ്ഥാന സെക്രട്ടറിയുടെ ചുമതലയുള്ളതിനാൽ ഇക്കുറി മത്സരിക്കില്ല. പയ്യന്നൂരിൽ സിറ്റിംഗ് എംഎൽഎ ടി.ഐ. മധുസൂദനൻ വീണ്ടും ജനവിധി തേടും.
പേരാവൂരിൽ ഇടതുപക്ഷം ജയിക്കുമെന്ന് കെ.കെ. ശൈലജ ആത്മവിശ്വാസം പ്രകടിപ്പിച്ചു. കുറേക്കാലമായി സണ്ണി ജോസഫ് എംഎൽഎയായിരിക്കുന്ന മണ്ഡലം ഇടതുപക്ഷത്തിന് ജയിക്കാൻ കഴിയുന്നതാണെന്ന് അവർ പറഞ്ഞു. സ്ഥാനാർത്ഥിത്വം സംബന്ധിച്ച അന്തിമ തീരുമാനം സംസ്ഥാന സെക്രട്ടേറിയറ്റാണ് എടുക്കുക. ഞായറാഴ്ച പാർട്ടി സ്ഥാനാർത്ഥികളെ ഔദ്യോഗികമായി പ്രഖ്യാപിക്കുമെന്നും ശൈലജ അറിയിച്ചു.