ബെംഗളൂരു: രാമമൂർത്തി നഗറിലെ വാടകവീട്ടിൽ യുവതിയെ മരിച്ച നിലയിൽ കണ്ടെത്തിയ സംഭവം കൊലപാതകമെന്ന് പോലീസ് സ്ഥിരീകരിച്ചു. ലൈംഗിക പീഡനശ്രമം എതിർത്ത 34-കാരിയായ ഷർമിളയെ സമീപവാസിയായ കർണാൽ കുറെ (18) കൊലപ്പെടുത്തുകയായിരുന്നു. പ്രതിയെ പോലീസ് അറസ്റ്റ് ചെയ്തു.
അപകടമെന്ന് ആദ്യം നിഗമനം: ജനുവരി 3-നാണ് സുബ്രഹ്മണി ലേഔട്ടിലെ അപ്പാർട്ട്മെന്റിൽ ഷർമിളയെ മരിച്ച നിലയിൽ കണ്ടെത്തിയത്. അപ്പാർട്ട്മെന്റിലുണ്ടായ തീപിടിത്തത്തിൽ ശ്വാസംമുട്ടി മരിച്ചതാണെന്നാണ് പോലീസ് ആദ്യം കരുതിയിരുന്നത്. എന്നാൽ അസ്വാഭാവിക മരണത്തിന് കേസെടുത്ത് നടത്തിയ അന്വേഷണത്തിലാണ് ഞെട്ടിക്കുന്ന വിവരങ്ങൾ പുറത്തുവന്നത്.ജനുവരി 3-ന് രാത്രി 9 മണിയോടെ സ്ലൈഡിങ് ജനാലയിലൂടെയാണ് പ്രതി യുവതിയുടെ വീട്ടിൽ അതിക്രമിച്ചു കയറിയത്. ലൈംഗികാതിക്രമം തടയാൻ ശ്രമിച്ച യുവതിയെ പ്രതി ക്രൂരമായി മർദിച്ചു.
മർദനമേറ്റ് യുവതി ബോധരഹിതയായതോടെ പ്രതി അവരുടെ വായും മൂക്കും മൂടിക്കെട്ടി. തുടർന്ന് നടന്ന രക്തസ്രാവത്തെത്തുടർന്നാണ് മരണം സംഭവിച്ചത്. കൊലപാതകത്തിന് ശേഷം തെളിവ് നശിപ്പിക്കുന്നതിനായി യുവതിയുടെ വസ്ത്രങ്ങൾ മെത്തയിലിട്ട് തീകൊളുത്തിയ ശേഷം പ്രതി രക്ഷപ്പെടുകയായിരുന്നു. ഇതാണ് അപ്പാർട്ട്മെന്റിൽ തീപിടിത്തമുണ്ടാകാൻ കാരണമായത്.
സെക്ഷൻ 103(1): കൊലപാതകം
സെക്ഷൻ 64(2), 66: ലൈംഗികാതിക്രമം
സെക്ഷൻ 238: തെളിവ് നശിപ്പിക്കൽ
പ്രതി കുറ്റം സമ്മതിച്ചതായും കേസിൽ കൂടുതൽ അന്വേഷണം പുരോഗമിക്കുകയാണെന്നും പോലീസ് അറിയിച്ചു.