കാഞ്ഞിരപ്പള്ളി: കുളപ്പുറത്ത് യുവതിയെയും യുവാവിനെയും വീടിനുള്ളിൽ മരിച്ച നിലയിൽ കണ്ടെത്തി. മോർക്കോലിൽ ഷേർലി മാത്യു (45) ആണ് കൊല്ലപ്പെട്ടത്. ഇവരെ കഴുത്തറുത്ത നിലയിലും കൂടെയുണ്ടായിരുന്ന യുവാവിനെ സ്റ്റെയർകേസിനോട് ചേർന്ന് തൂങ്ങിമരിച്ച നിലയിലുമാണ് കണ്ടെത്തിയത്. മരിച്ച യുവാവ് കോട്ടയം സ്വദേശിയാണെന്നാണ് പ്രാഥമിക നിഗമനം.
സമയം: ഞായറാഴ്ച രാത്രി ഒൻപതരയോടെയാണ് മൃതദേഹങ്ങൾ കണ്ടെത്തിയത്.
കണ്ടെത്തിയത്: ഷേർലിയെ ഫോണിൽ വിളിച്ചിട്ട് ലഭിക്കാതെ വന്നതോടെ ബന്ധുക്കൾ നടത്തിയ അന്വേഷണത്തിലാണ് ഞെട്ടിക്കുന്ന വിവരം പുറത്തറിയുന്നത്. കിടപ്പുമുറിയിലെ കട്ടിലിനോട് ചേർന്ന് രക്തത്തിൽ കുളിച്ച നിലയിലായിരുന്നു ഷേർലിയുടെ മൃതദേഹം.
പ്രാഥമിക നിഗമനം: ഷേർലിയെ കഴുത്തറുത്ത് കൊലപ്പെടുത്തിയ ശേഷം യുവാവ് ആത്മഹത്യ ചെയ്തതാകാമെന്നാണ് പോലീസിന്റെ പ്രാഥമിക വിലയിരുത്തൽ.ഭർത്താവ് മരിച്ചതിനെ തുടർന്ന് ആറ് മാസം മുൻപാണ് ഷേർലി കുളപ്പുറത്തെ ഈ വീട്ടിലേക്ക് താമസം മാറിയതെന്ന് നാട്ടുകാർ പറഞ്ഞു. യുവാവുമായുള്ള ബന്ധത്തെക്കുറിച്ചും കൊലപാതകത്തിലേക്ക് നയിച്ച കാരണത്തെക്കുറിച്ചും കാഞ്ഞിരപ്പള്ളി പോലീസ് വിശദമായ അന്വേഷണം ആരംഭിച്ചു. മൃതദേഹങ്ങൾ ഇൻക്വസ്റ്റ് നടപടികൾക്ക് ശേഷം പോസ്റ്റ്മോർട്ടത്തിനായി മാറ്റി.