വൈദ്യുതിക്കമ്പിയില് തട്ടി ഷോക്കേറ്റ് മരിച്ച മിഥുന്റെ മൃതദേഹം തേവലക്കര ബോയ്സ് ഹൈസ്കൂളിൽ പൊതുദര്ശനത്തിന് വെച്ചു. മിഥുന്റെ ചേതനയറ്റ ശരീരം കാണേണ്ടി വന്നതിന്റെ സങ്കടം കൂട്ടുകാരിലും നാട്ടുകാരിലും നിഴലിച്ചു നിൽക്കുന്നു. അധ്യാപകരടക്കം കണ്ടുനിന്നവരൊക്കെ വിങ്ങിപ്പൊട്ടി.
ഭാവിയില് പട്ടാളക്കാരനാവാന് കൊതിച്ചിരുന്ന മിഥുൻ സ്കൂളിലെ എന്സിസി കേഡറ്റാവാന് ഉടുപ്പും തയ്പ്പിക്കാന് കൊടുത്തിരുന്നു. മിഥുനെ ഒരു നോക്കു കാണാനായി നൂറുകണക്കിനാളുകളാണ് സ്കൂള് മുറ്റത്ത് എത്തിയത്. കൊടിക്കുന്നില് സുരേഷ് എം.പി. ഉള്പ്പെടെ മിഥുനെ ഇന്നുവരെ കാണാത്തവരും അറിയാത്തവരുമെല്ലാം അക്കൂട്ടത്തിലുണ്ടായിരുന്നു.
ഫുട്ബോളില് സെലക്ഷന് കിട്ടിയതിന്റെ സന്തോഷത്തില് മിഠായി വിതരണം ചെയ്തിരുന്നു. സഹായമനസ്കനായ, പ്രായത്തില്ക്കവിഞ്ഞ പക്വതയോടെ പെരുമാറിയ മിടുക്കനായിരുന്നു മിഥുനെന്ന് പ്രായഭേദമന്യേ എല്ലാവരും പറയുന്നു.
കുവൈത്തില് ജോലി ചെയ്യുന്ന അമ്മ സുജ, ഇന്ന് രാവിലെയാണ് നെടുമ്പാശ്ശേരി വിമാനത്താവളത്തിലെത്തിയത്. തേവലക്കര സ്കൂളില് നിന്ന് വീട്ടിലെത്തിച്ചശേഷം വൈകീട്ട് നാലിന് മിഥുന്റെ മൃതദേഹം സംസ്കരിക്കും.
Tag: Mithun’s death; Schoolyard a sea of grief