ലണ്ടൻ: ബോളിവുഡ് താരങ്ങളായ ഷാരൂഖ് ഖാനും കാജോളിനും ലണ്ടനിൽ അപൂർവ ബഹുമതി. ഇരുവരും ഒന്നിച്ചെത്തിയ എക്കാലത്തെയും വലിയ ഹിറ്റായ ‘ദിൽവാലെ ദുൽഹാനിയ ലേ ജായേംഗെ’ (DDLJ) എന്ന ചിത്രത്തിന്റെ 30-ാം വാർഷികാഘോഷത്തിന്റെ ഭാഗമായി, ചിത്രത്തിലെ കഥാപാത്രങ്ങളായ രാജിന്റെയും സിമ്രാന്റെയും വെങ്കല പ്രതിമ ലെസ്റ്റർ സ്ക്വയറിൽ അനാച്ഛാദനം ചെയ്തു.
’DDLJ’ എന്ന ബ്രഹ്മാണ്ഡ ചിത്രം പുറത്തിറങ്ങി മൂന്ന് പതിറ്റാണ്ടുകൾ പിന്നിടുമ്പോൾ, സിനിമയുടെ ഓർമ്മകൾ പുതുക്കാനാണ് ഷാരൂഖ് ഖാനും കാജോളും ലണ്ടനിലെത്തിയത്. ലണ്ടനിലെ ലെസ്റ്റർ സ്ക്വയറാണ് ചിത്രത്തിൽ രാജും സിമ്രാനും ആദ്യമായി കണ്ടുമുട്ടിയ പ്രധാന ലൊക്കേഷനുകളിൽ ഒന്ന്. ബോളിവുഡ് മാന്ത്രികതയ്ക്ക് യുകെയുടെ ഹൃദയത്തിൽ ലഭിച്ച ആദരവായി ഈ നിമിഷം മാറി.
ഷാരൂഖും കാജോളും ചേർന്ന് തങ്ങളുടെ കഥാപാത്രങ്ങളുടെ വെങ്കല പ്രതിമ അനാച്ഛാദനം ചെയ്തു. തുടർന്ന്, ചിത്രത്തിലെ സൂപ്പർഹിറ്റ് ഗാനമായ ‘മെഹന്ദി ലഗാ കെ രഖ്ന’യിലെ തങ്ങളുടെ പ്രിയപ്പെട്ട നൃത്ത പോസിൽ മാധ്യമങ്ങൾക്കായി ഇരുവരും ഫോട്ടോയ്ക്ക് പോസ് ചെയ്യുകയും ചെയ്തു.”ഈ നിമിഷം ഒരു ചരിത്ര നാഴികക്കല്ലാണ്,” ഷാരൂഖ് ഖാൻ ഇൻസ്റ്റാഗ്രാമിൽ കുറിച്ചു. “സീൻസ് ഇൻ ദി സ്ക്വയർ ട്രെയിലിൽ ഒരു പ്രതിമ സ്ഥാപിച്ച് ആദരിക്കപ്പെടുന്ന ആദ്യത്തെ ഇന്ത്യൻ സിനിമയാണ് DDLJ എന്നതിൽ അതിയായ സന്തോഷമുണ്ട്. ഇത് സാധ്യമാക്കിയ യുകെയിലെ എല്ലാവർക്കും വലിയ നന്ദി.”
കൂടാതെ, “നിങ്ങൾ ലണ്ടനിലാണെങ്കിൽ രാജിനെയും സിമ്രാനെയും കാണാൻ വരൂ… DDLJ-യുമായി നിങ്ങൾ കൂടുതൽ ഓർമ്മകൾ സൃഷ്ടിക്കുന്നത് കാണാൻ ഞങ്ങൾ ആഗ്രഹിക്കുന്നു,” എന്നും അദ്ദേഹം ആരാധകരോട് പറഞ്ഞു