മാവേലിക്കര/തിരുവല്ല: പോലീസ് നടപടികളോട് കടുത്ത പ്രതിഷേധം രേഖപ്പെടുത്തി രാഹുൽ മാങ്കൂട്ടത്തിൽ എംഎൽഎ. ചൊവ്വാഴ്ച കോടതിയിൽ ഹാജരാക്കുന്നതിന് തൊട്ടുമുൻപാണ് പോലീസിനെതിരെ രാഹുൽ രൂക്ഷമായി പ്രതികരിച്ചത്. തന്നെ പോലീസ് വഞ്ചിച്ചുവെന്നും പല കാര്യങ്ങളും വിശ്വസിച്ച് പറഞ്ഞത് മാധ്യമങ്ങൾക്ക് ചോർത്തി നൽകിയെന്നുമാണ് രാഹുലിന്റെ ആരോപണം.
”ഞാൻ നിങ്ങളോട് പൂർണ്ണമായും സഹകരിച്ചില്ലേ? പല കാര്യങ്ങളും നിങ്ങളെ വിശ്വസിച്ചല്ലേ പറഞ്ഞത്, അതെല്ലാം മാധ്യമങ്ങൾക്ക് ചോർത്തിക്കൊടുക്കാമോ?” – രാഹുൽ ഉദ്യോഗസ്ഥരോട് ചോദിച്ചു. താൻ ഒരു എംഎൽഎ ആണെന്ന കാര്യം പരിഗണിച്ചില്ലേ എന്നും അദ്ദേഹം ആവർത്തിച്ച് ചോദിച്ചെങ്കിലും പോലീസ് ഉദ്യോഗസ്ഥർ ഇതിനോട് പ്രതികരിക്കാൻ തയ്യാറായില്ല.
രാഹുലിനെ ജനുവരി 15-ന് ഉച്ചവരെ പോലീസ് കസ്റ്റഡിയിൽ വിട്ടു. തിരുവല്ല ജുഡീഷ്യൽ ഫസ്റ്റ് ക്ലാസ് മജിസ്ട്രേറ്റ് അരുന്ധതി ദിലീപിന്റേതാണ് ഉത്തരവ്.രാഹുലിന്റെ ജാമ്യാപേക്ഷ കോടതി ഈ മാസം 16-ന് പരിഗണിക്കും.
വാദങ്ങൾ: അറസ്റ്റ് നടപടികൾ ക്രമപ്രകാരമല്ലെന്ന് പ്രതിഭാഗം അഭിഭാഷകൻ അഭിലാഷ് ചന്ദ്രൻ വാദിച്ചു. എന്നാൽ, അറസ്റ്റ് മെമ്മോയിൽ പോലും ഒപ്പിടാതെ രാഹുൽ അന്വേഷണത്തോട് നിസ്സഹകരിക്കുകയാണെന്ന് അഡീഷണൽ പബ്ലിക് പ്രോസിക്യൂട്ടർ എം.ജി. ദേവി കോടതിയെ അറിയിച്ചു.
കാനഡയിൽ ജോലി ചെയ്യുന്ന 31-കാരിയായ യുവതിയുടെ പരാതിയിലാണ് ശനിയാഴ്ച രാത്രി പാലക്കാട്ടുനിന്ന് രാഹുലിനെ അറസ്റ്റ് ചെയ്തത്. നിലവിൽ രാഹുലിനെ പത്തനംതിട്ട എആർ ക്യാമ്പിലേക്കാണ് മാറ്റിയിരിക്കുന്നത്. കസ്റ്റഡി കാലാവധിക്ക് ശേഷം വ്യാഴാഴ്ച അദ്ദേഹത്തെ വീണ്ടും കോടതിയിൽ ഹാജരാക്കും