“ഞാൻ ഒരു മത്സരത്തിന്റെ ഇരയാണ്”; കലോത്സവ രീതികളെ വിമർശിച്ച് നവ്യ നായർ

നവ്യ നായരുടെ ഉടമസ്ഥതയിലുള്ള ‘മാതംഗി’ എന്ന നൃത്ത വിദ്യാലയവുമായി ബന്ധപ്പെട്ട് സോഷ്യൽ മീഡിയയിൽ പങ്കുവെച്ച വീഡിയോയിലാണ് താരം മനസ്സ് തുറന്നത്.മത്സരങ്ങൾ ജീവിതത്തിൽ എവിടെയും എത്തിക്കില്ല: ഒരു കലാരൂപം പഠിക്കുന്നത് മത്സരത്തിനല്ലെന്നും ജീവിതത്തിൽ നമ്മൾ മത്സരിക്കേണ്ടത് നമ്മളോട് തന്നെയാണെന്നും നവ്യ പറയുന്നു. ഇന്നലത്തെ നമ്മളേക്കാൾ എത്ര മികച്ചതാണ് ഇന്നത്തെ നമ്മൾ എന്ന് മാത്രമേ നോക്കേണ്ടതുള്ളൂ.

പത്തു മിനിറ്റിലെ ‘ക്യാപ്‌സൂൾ’ വർണ്ണം: ഭരതനാട്യത്തിലെ ഏറ്റവും പ്രധാനപ്പെട്ട ഇനമായ ‘വർണ്ണം’ 20 മുതൽ 25 മിനിറ്റ് വരെ അവതരിപ്പിക്കേണ്ട ഒന്നാണ്. എന്നാൽ കലോത്സവങ്ങളിൽ ഇതിനെ 10 മിനിറ്റിലേക്ക് ഒതുക്കി അവതരിപ്പിക്കുന്നത് അന്യസംസ്ഥാനങ്ങളിലെ കലാകാരന്മാർ പുച്ഛത്തോടെയാണ് കാണുന്നതെന്ന് നവ്യ ചൂണ്ടിക്കാട്ടി.
​കലോത്സവ ഇര: 2001-ലെ സംസ്ഥാന സ്കൂൾ കലോത്സവത്തിൽ കലാതിലകപ്പട്ടം നഷ്ടപ്പെട്ടപ്പോൾ മാധ്യമങ്ങൾക്ക് മുന്നിൽ പൊട്ടിക്കരഞ്ഞ തന്റെ പഴയ വീഡിയോയെക്കുറിച്ച് നവ്യ പരാമർശിച്ചു. തന്നെത്തന്നെ ഒരു “മത്സരത്തിന്റെ ഇര” എന്നാണ് നവ്യ വിശേഷിപ്പിച്ചത്. തന്റെ കുട്ടികൾ അനാവശ്യമായ ആ കരച്ചിലിലേക്ക് എത്താൻ താൻ ആഗ്രഹിക്കുന്നില്ലെന്നും താരം കൂട്ടിചേർത്തു.

അന്ന് അമ്പിളി ദേവി കലാതിലകമായപ്പോൾ താൻ നടത്തിയ പ്രതികരണം കേവലം ഒരു പതിനഞ്ചുകാരിയുടെ പക്വതക്കുറവായിരുന്നുവെന്ന് നവ്യ ഇപ്പോൾ തിരിച്ചറിയുന്നു. മറ്റൊരു കുട്ടിയുടെ പ്രകടനം പോലും കാണാതെയായിരുന്നു അന്നത്തെ തന്റെ പ്രതികരണം.മത്സരങ്ങൾക്ക് കുട്ടികളെ ട്രെയിൻ ചെയ്യുന്നതിന് പകരം കലയെ അതിന്റെ പൂർണ്ണതയിൽ പഠിപ്പിക്കാനാണ് തന്റെ നൃത്ത വിദ്യാലയം ശ്രദ്ധിക്കുന്നതെന്ന് നവ്യ പറഞ്ഞു.