പത്തനംതിട്ട: കോന്നിയിലെ പാറമടയിൽ ഉണ്ടായ അപകടത്തിൽ കാണാതായ ബീഹാർ സ്വദേശി അജയ് റാവുവിനായി തിരച്ചിൽ തുടരുന്നു. ഫയർഫോഴ്സിനൊപ്പം 27 അംഗ എൻഡിആർഎഫ് സംഘം കൂടി രക്ഷാപ്രവർത്തനത്തിൽ ഏർപ്പെട്ടിട്ടുണ്ട്. അപകടത്തിൽ ഒഡീഷ സ്വദേശി മഹാദേവ് മരിച്ചു.
കാണാതായ അജയ് റാവുവിന്റെ തിരച്ചിൽ ഇന്ന് രാവിലെ ഏഴുമുതലാണ് വീണ്ടും ആരംഭിച്ചത്. അപകടം സംഭവിച്ചത് ഇന്നലെ ഉച്ചയോടെയായിരുന്നു. ഹിറ്റാച്ചി ഉപയോഗിച്ച് പാറകൾ നീക്കം ചെയ്യുന്നതിനിടെ വലിയ പാറകഷ്ണങ്ങൾ ഹിറ്റാച്ചിക്ക് മുകളിലേക്ക് വീണാണ് അപകടം ഉണ്ടായത്. ക്വാറിക്ക് അനുമതി ഇല്ലെന്നാണ് നാട്ടുകാരുടെ പരാതി. സംഭവവുമായി ബന്ധപ്പെട്ട് റിപ്പോർട്ട് തേടി കളക്ടർ ഇടപെട്ടിട്ടുണ്ട്.