ലോര്ഡ്സ് ടെസ്റ്റിന്റെ ഒന്നാംദിനം ഇന്ത്യക്ക് ആശങ്കയായി വിക്കറ്റ് കീപ്പര് റിഷഭ് പന്തിന്റെ പരിക്ക്. മുപ്പത്തിനാലാം ഓവറില് ആയിരുന്നു സംഭവം. ജസ്പ്രിത് ബുംറയുടെ പന്ത് കീപ്പ് ചെയ്യുന്നതിനിടെ റിഷഭ് പന്തിന്റെ ഇടതു കൈയിലെ ചൂണ്ടുവിരലിനാണ് പരിക്കേറ്റത്. ഗ്രൗണ്ടില് തന്നെ റിഷഭ് പന്തിന് പ്രാഥമിക ചികിത്സ നല്കി. വിശദ പരിശോധനയ്ക്കായി റിഷഭ് പന്ത് കളിക്കളം വിട്ടപ്പോള് ധ്രുവ് ജുറലാണ് പകരം വിക്കറ്റിന് പിന്നിലെത്തിയത്. പന്തിന് ലോര്ഡ്സില് തുടരാനാകുമോ എന്നുള്ള കാര്യത്തില് വ്യക്തതയില്ല. പന്തിന് പരിക്കുണ്ടെന്ന് ബിസിസിസഐ സ്ഥിരീകരിച്ചിരുന്നു.
.നിലവില് മെഡിക്കല് ടീമിന്റെ കൂടെയാണ് പന്ത്. അദ്ദേഹത്തിന്റെ ചൂണ്ടുവിരലിന് പരിക്കുണ്ട്. പന്തിന്റെ അഭാവത്തില് ധ്രുവ് ജുറല് വിക്കറ്റ് കീപ്പറുടെ ഗ്ലൗസണിയും.” ബിസിസിഐ എക്സില് കുറിച്ചിട്ടു. പന്തിന്റെ പരിക്കിനെ കുറിച്ച് വ്യക്തതയില്ലെന്ന് ഇന്ത്യന് ഓള്റൗണ്ടര് നിതീഷ് കുമാര് റെഡ്ഡി ആദ്യ ദിവസത്തെ മത്സരത്തിന് ശേഷം വ്യക്തമാക്കി. ”ഞാനിപ്പോള് ഗ്രൗണ്ടില് നിന്ന് കയറിവന്നതേയൊള്ളൂ. പന്തിന്റെ പരിക്കിനെ കുറിച്ച് ഇപ്പോള് വലിയ ധാരണയില്ല. നാളെ രാവിലെ അതിനെ കുറിച്ച് കൂടുതല് അറിയുമായിരിക്കും എന്ന് നിതീഷ് വ്യക്തമാക്കി. പന്തിന്റെ കാര്യത്തില് ആശങ്കപ്പെടേണ്ടതില്ലെന്നും രണ്ടാം ദിനം അദ്ദേഹം കളിക്കാനെത്തുമെന്നും ചില എക്സ് പോസ്റ്റുകളും വ്യക്തമാക്കുന്നു.
അതേസമയം, ലോര്ഡ്സ് ടെസ്റ്റിന്റെ ആദ്യ ദിനം അവസാനിക്കുമ്പോള് ഇംഗ്ലണ്ട് മാന്യമായ നിലയിലാണ്. ടോസ് നേടി ബാറ്റിംഗ് തിരഞ്ഞെടുത്ത ഇംഗ്ലണ്ട് ഒന്നാം ദിനം സ്റ്റംപെടുക്കുമ്പോള് നാല് വിക്കറ്റ് നഷ്ടത്തില് 251 റണ്സെടുത്തിട്ടുണ്ട്. ജോ റൂട്ട് (99), ബെന് സ്റ്റോക്സ് (39) എന്നിവരാണ് ക്രീസില്. ഇന്ത്യക്ക് വേണ്ടി നിതീഷ് കുമാര് റെഡ്ഡി രണ്ട് വിക്കറ്റ് വീഴ്ത്തി. രണ്ടാം ടെസ്റ്റില് കളിച്ച ടീമില് ഇന്ത്യ ഒരു മാറ്റവുമായിട്ടാണ് ഇറങ്ങിയത്. പേസര് പ്രസിദ്ധ് കൃഷ്ണക്ക് പകരം ജസ്പ്രീത് ബുമ്ര ടീമിലെത്തി.
Tag: Rishabh Pant’s injury is a concern for India