ബെംഗളൂരു: കന്നഡ സൂപ്പർ താരം യാഷ് നായകനാകുന്ന ‘ടോക്സിക്: എ ഫെയറി ടെയിൽ ഫോർ ഗ്രോൺ അപ്പ്സ്’ എന്ന ചിത്രത്തിലെ ദൃശ്യങ്ങൾ സ്ത്രീകളെ അപമാനിക്കുന്നതാണെന്ന് ചൂണ്ടിക്കാട്ടി കർണാടക സംസ്ഥാന വനിതാ കമ്മീഷൻ. ചിത്രത്തിലെ അശ്ലീല ഉള്ളടക്കത്തിനെതിരെ നടപടി സ്വീകരിക്കണമെന്ന് ആവശ്യപ്പെട്ട് സെൻട്രൽ ബോർഡ് ഓഫ് ഫിലിം സർട്ടിഫിക്കേഷന് (CBFC) കമ്മീഷൻ കത്ത് നൽകി.
ആം ആദ്മി പാർട്ടി വനിതാ വിഭാഗം സമർപ്പിച്ച ഹർജിയുടെ അടിസ്ഥാനത്തിലാണ് വനിതാ കമ്മീഷന്റെ ഇടപെടൽ. ടീസറിലെ ചില രംഗങ്ങൾ സ്ത്രീകളുടെ മാനമര്യാദയെ ചോദ്യം ചെയ്യുന്നതാണെന്നും കന്നഡ സംസ്കാരത്തെ പരിഹസിക്കുന്നതാണെന്നും എ.എ.പി നേതാക്കൾ ആരോപിച്ചു.
സെമിത്തേരിക്ക് സമീപം കാറിനുള്ളിൽ ഒരു സ്ത്രീയുമായി യാഷ് അടുത്തിടപഴകുന്ന രംഗമാണ് പ്രധാനമായും വിവാദമായത്.പ്രായപരിധി മുന്നറിയിപ്പില്ലാതെ ഇത്തരം ദൃശ്യങ്ങൾ പുറത്തുവിട്ടത് കുട്ടികൾക്കും സ്ത്രീകൾക്കും ദോഷകരമാണെന്നും പരാതിയിൽ പറയുന്നു.
വിവാദമായ ടീസർ പിൻവലിക്കണമെന്ന് എ.എ.പി നേതാക്കൾ കമ്മീഷനോട് ആവശ്യപ്പെട്ടു. ഹർജിയിലെ ആരോപണങ്ങൾ നിയമപരമായി പരിശോധിച്ച് തുടർനടപടികൾ സ്വീകരിക്കാനും റിപ്പോർട്ട് സമർപ്പിക്കാനും ബന്ധപ്പെട്ട അധികാരികളോട് വനിതാ കമ്മീഷൻ നിർദ്ദേശിച്ചു.
മലയാളി സംവിധായിക ഗീതു മോഹൻദാസ് ഒരുക്കുന്ന ഈ ബിഗ് ബജറ്റ് ചിത്രം പ്രഖ്യാപനം മുതൽക്കേ വാർത്തകളിൽ നിറഞ്ഞുനിന്നിരുന്നു.ഡിസംബർ 8-ന് യാഷിന്റെ ജന്മദിനത്തോടനുബന്ധിച്ചാണ് ടീസർ പുറത്തിറക്കിയത്.
കിയാര അദ്വാനി, നയൻതാര, ഹുമ ഖുറേഷി, രുക്മിണി വസന്ത് തുടങ്ങിയ വൻ താരനിര തന്നെ ചിത്രത്തിലുണ്ട്.
ചിത്രത്തിന്റെ റിലീസിന് മുൻപേ ടീസർ നിയമക്കുരുക്കിലായത് അണിയറ പ്രവർത്തകർക്കും ആരാധകർക്കും ഒരുപോലെ ആശങ്കയുണ്ടാക്കുന്നുണ്ട്.