റഷ്യയിൽ നിന്നുള്ള ഇന്ധന ഇറക്കുമതി തുടരുന്ന രാജ്യങ്ങൾക്ക് കനത്ത തിരിച്ചടി നൽകിക്കൊണ്ട് അമേരിക്കൻ പ്രസിഡന്റ് ഡൊണാൾഡ് ട്രംപ് പുതിയ ബില്ലിൽ ഒപ്പുവെച്ചു. റഷ്യൻ പെട്രോളിയം ഉൽപ്പന്നങ്ങൾ വാങ്ങുന്ന രാജ്യങ്ങളിൽ നിന്നുള്ള ഇറക്കുമതിക്ക് 500 ശതമാനം വരെ തീരുവ (Tariff) ചുമത്താനാണ് നീക്കം. ഇതോടെ ഇന്ത്യയും അമേരിക്കയും തമ്മിലുള്ള വ്യാപാര ബന്ധം കടുത്ത പ്രതിസന്ധിയിലേക്ക് നീങ്ങുകയാണ്.
ഇന്ത്യക്ക് തിരിച്ചടി: റഷ്യയിൽ നിന്ന് വലിയ തോതിൽ അസംസ്കൃത എണ്ണ ഇറക്കുമതി ചെയ്യുന്ന രാജ്യമാണ് ഇന്ത്യ. നേരത്തെ തന്നെ ഇന്ത്യൻ ഉൽപ്പന്നങ്ങൾക്ക് മേൽ 50 ശതമാനത്തോളം തീരുവ വർദ്ധിപ്പിച്ചിരുന്ന ട്രംപ്, പുതിയ നീക്കത്തിലൂടെ ഇന്ത്യയെ കൂടുതൽ പ്രതിരോധത്തിലാക്കിയിരിക്കുകയാണ്.റഷ്യ-ഉക്രൈൻ യുദ്ധത്തിൽ റഷ്യയെ സാമ്പത്തികമായി സഹായിക്കുന്നത് ഇത്തരം എണ്ണക്കച്ചവടങ്ങളാണെന്നാണ് വൈറ്റ് ഹൗസിന്റെ നിലപാട്. ഇന്ത്യ നൽകുന്ന പണം മോസ്കോയുടെ യുദ്ധസന്നാഹങ്ങൾക്ക് കരുത്തുപകരുന്നു എന്ന് ട്രംപ് ആരോപിക്കുന്നു.
വാഷിംഗ്ടണുമായുള്ള ഇന്ത്യയുടെ നയതന്ത്ര ബന്ധത്തെയും ഐടി, ഫാർമ തുടങ്ങിയ മേഖലകളിലെ കയറ്റുമതിയെയും ഈ തീരുവ വർദ്ധനവ് പരോക്ഷമായി ബാധിക്കാൻ സാധ്യതയുണ്ട്. ഇന്ത്യയുടെ തനതായ വിദേശനയവും അമേരിക്കയുടെ ‘അമേരിക്ക ഫസ്റ്റ്’ (America First) നയവും തമ്മിലുള്ള വലിയൊരു ഏറ്റുമുട്ടലിനാണ് ആഗോള സാമ്പത്തിക രംഗം സാക്ഷ്യം വഹിക്കുന്നത്.