ന്യൂഡൽഹി: ഡൽഹി കലാപ ഗൂഢാലോചനക്കേസിൽ യുഎപിഎ (UAPA) ചുമത്തപ്പെട്ട് അഞ്ച് വർഷമായി ജയിലിൽ കഴിയുന്ന ഉമർ ഖാലിദിന് ന്യൂയോർക്ക് സിറ്റി മേയർ സൊഹ്റാൻ മംദാനി കത്തയച്ചതിനെതിരെ രൂക്ഷ വിമർശനവുമായി ബിജെപി. ഇന്ത്യയുടെ ആഭ്യന്തര കാര്യങ്ങളിലും നിയമവ്യവസ്ഥയിലും പുറത്തുനിന്നുള്ളവർ ഇടപെടുന്നത് രാജ്യം സഹിക്കില്ലെന്ന് ബിജെപി വക്താവ് ഗൗരവ് ഭാട്ടിയ വ്യക്തമാക്കി.
2026 ജനുവരി ഒന്നിന് ന്യൂയോർക്ക് മേയറായി സത്യപ്രതിജ്ഞ ചെയ്ത് അധികാരമേറ്റതിന് പിന്നാലെയാണ് മംദാനിയുടെ കത്ത് പുറത്തുവന്നത്.”പ്രിയപ്പെട്ട ഉമർ, നിങ്ങളെക്കുറിച്ചുള്ള ഓർമ്മകൾ എപ്പോഴും കൂടെയുണ്ട്. കയ്പ്പേറിയ അനുഭവങ്ങൾ നമ്മെ നശിപ്പിക്കാൻ അനുവദിക്കരുതെന്ന താങ്കളുടെ വാക്കുകൾ ഞാൻ പലപ്പോഴും ഓർക്കാറുണ്ട്,” എന്ന് മംദാനി കത്തിൽ കുറിച്ചു.
ഉമർ ഖാലിദിന്റെ മാതാപിതാക്കളെ നേരിൽ കണ്ടതിലെ സന്തോഷവും മംദാനി കത്തിൽ പങ്കുവെച്ചിരുന്നു.
ഇന്ത്യയുടെ ജനാധിപത്യത്തെയും നിയമസംവിധാനത്തെയും ചോദ്യം ചെയ്യാൻ പുറത്തുനിന്നുള്ളവർക്ക് എന്ത് അധികാരമാണുള്ളതെന്ന് ബിജെപി ചോദിക്കുന്നു.
”ഇന്ത്യയുടെ പരമാധികാരത്തെ ചോദ്യം ചെയ്യാൻ ആരെയും അനുവദിക്കില്ല. രാജ്യത്തെ തകർക്കാൻ ശ്രമിക്കുന്നവർക്ക് പിന്തുണ നൽകുന്നത് ശരിയായ നടപടിയല്ല,” എന്ന് ഗൗരവ് ഭാട്ടിയ വാർത്താ സമ്മേളനത്തിൽ പറഞ്ഞു.
കോൺഗ്രസ് നേതാവ് രാഹുൽ ഗാന്ധിയുടെ വിദേശ സന്ദർശനങ്ങളുമായി ബന്ധപ്പെടുത്തിയും ബിജെപി ഈ വിഷയത്തിൽ വിമർശനം ഉയർത്തുന്നുണ്ട്.
വിചാരണയില്ലാത്ത തടവ്: 2020 സെപ്റ്റംബർ മുതൽ വിചാരണയില്ലാതെ ജയിലിൽ കഴിയുന്ന ഉമർ ഖാലിദിന് ജാമ്യം നൽകണമെന്നും നീതിയുക്തമായ വിചാരണ ഉറപ്പാക്കണമെന്നും ആവശ്യപ്പെട്ട് അമേരിക്കയിലെ എട്ട് നിയമനിർമ്മാതാക്കളും (US Lawmakers) നേരത്തെ രംഗത്തെത്തിയിരുന്നു.ഇടക്കാല ജാമ്യം: സഹോദരിയുടെ വിവാഹത്തിൽ പങ്കെടുക്കുന്നതിനായി 2025 ഡിസംബർ 16 മുതൽ 29 വരെ ഉമർ ഖാലിദിന് കോടതി ഇടക്കാല ജാമ്യം അനുവദിച്ചിരുന്നു. കടുത്ത നിബന്ധനകളോടെയായിരുന്നു ഈ ജാമ്യം.