കേരളത്തിന്റെ സ്വർണ വിപണിയിൽ ചരിത്രം കുറിച്ച് വില സർവകാല റെക്കോർഡിൽ. ഒരു പവൻ സ്വർണത്തിന് വില ആദ്യമായി 99,000 രൂപ കടന്നു. ഇന്ന് രാവിലെയും ഉച്ചയ്ക്കുമായി 1,080 രൂപയുടെ വർധനവാണ് രേഖപ്പെടുത്തിയത്. ഇതോടെ സ്വർണവില 99,280 രൂപയായി. നിലവിലെ ട്രെൻഡ് തുടർന്നാൽ ഇന്ന് തന്നെയോ നാളെയോ ഒരു ലക്ഷം രൂപ എന്ന ‘മാന്ത്രിക സംഖ്യ’ മറികടക്കാനുള്ള സാധ്യതയേറെയാണ്.കഴിഞ്ഞ ഒരു വർഷത്തിനിടെ മാത്രം ഒരു പവന് കൂടിയത് 42,160 രൂപയാണ്. സ്വർണവില ഇത്രയും വലിയ കുതിച്ചുചാട്ടം നടത്തിയ ഒരു കാലഘട്ടം മുൻപ് ഉണ്ടായിട്ടില്ല.കഴിഞ്ഞ ഒരു ദശാബ്ദത്തിനിടെ (2015 മുതൽ 2025 വരെ) മാത്രം പവന് 79,000 രൂപയിലധികം വർധനവുണ്ടായി. ഇത് സ്വർണത്തിൽ നിക്ഷേപം നടത്തിയവർക്ക് സ്വപ്നതുല്യമായ നേട്ടമാണ് നൽകുന്നത്.
നിലവിലെ പവന്റെ വില 99,280 രൂപയാണെങ്കിലും, ഒരു പവൻ സ്വർണാഭരണം വാങ്ങുമ്പോൾ മറ്റ് ചെലവുകൾ കൂടി കണക്കിലെടുക്കണം:
3% ജിഎസ്ടി
കുറഞ്ഞത് 5% പണിക്കൂലി
ഹോൾമാർക്ക് ഫീസ് (53.10 രൂപ)
ഇതെല്ലാം പരിഗണിക്കുമ്പോൾ, കേരളത്തിൽ ഇന്ന് ഒരു പവൻ ആഭരണം വാങ്ങാൻ ഏകദേശം 1.15 ലക്ഷം രൂപയോളം നൽകേണ്ടി വരും.ഒരു ഗ്രാം സ്വർണം: രാവിലെയും ഉച്ചയ്ക്കുമായി 135 രൂപ ഉയർന്ന് 12,410 രൂപയായി.
18 കാരറ്റ് സ്വർണം: ഉച്ചയ്ക്ക് 50 രൂപ വർധിച്ച് റെക്കോർഡ് വിലയായ 10,265 രൂപയായി. (മറ്റൊരു വിഭാഗം വ്യാപാരികൾ നൽകിയ വില: 10,205 രൂപ)വെള്ളിവില: മാറ്റമില്ലാതെ ഒരു ഗ്രാമിന് 198 രൂപയിൽ തുടരുന്നു.
സ്വർണവിലയിലെ ഈ വൻ മുന്നേറ്റത്തിന് പ്രധാനമായും രണ്ട് കാരണങ്ങളാണുള്ളത്:
ഡോളറിന്റെ തളർച്ച: അമേരിക്കയിൽ അടിസ്ഥാന പലിശനിരക്ക് കുറയ്ക്കാനുള്ള സാധ്യത ശക്തമായതോടെ ലോക കറൻസികൾക്കെതിരെ ഡോളർ തളർന്നു. ഇത് സ്വർണത്തിന് ഉത്തേജകമായി. യുഎസ് ഫെഡറൽ റിസർവിൽ ട്രംപിന്റെ വിശ്വസ്തനെ ചെയർമാനായി നിയമിക്കാനുള്ള നീക്കങ്ങൾ 2026ലും പലിശനിരക്ക് കുറയ്ക്കുന്നതിന് വഴിയൊരുക്കും. നിക്ഷേപമെന്ന നിലയിൽ സ്വർണത്തിനുള്ള ഡിമാൻഡ് ഇത് കുത്തനെ വർദ്ധിപ്പിച്ചു. ഡോളർ ദുർബലമായത് സ്വർണം വാങ്ങുന്നത് എളുപ്പമാക്കിയതും വില കൂടാൻ കാരണമായി. നിലവിൽ രാജ്യാന്തര സ്വർണവില ഔൺസിന് 46 ഡോളർ ഉയർന്ന് 4,347 ഡോളറിലാണ്.
രൂപയുടെ തകർച്ച: ഇന്ത്യയിൽ ഡോളറിനെതിരെ രൂപ ചരിത്രത്തിലെ ഏറ്റവും താഴ്ന്ന നിലയിലേക്ക് കൂപ്പുകുത്തി. 26 പൈസ ഇടിഞ്ഞ് 90.75 എന്ന റെക്കോർഡ് താഴ്ചയിലാണ് രൂപ. രൂപയുടെ തളർച്ച സ്വർണത്തിന്റെ ഇറക്കുമതിച്ചെലവ് വർദ്ധിപ്പിക്കുകയും അത് ആഭ്യന്തര വിപണിയിലെ വില വർധനയ്ക്ക് ആക്കം കൂട്ടുകയും ചെയ്തു