ഇന്റർ മയാമി സി.എഫിൻ്റെ ഇതിഹാസ താരം ലയണൽ മെസ്സിയെ തേടി 2025-ലെ മേജർ ലീഗ് സോക്കറിലെ (എം.എൽ.എസ്.) ഏറ്റവും മൂല്യമേറിയ താരത്തിനുള്ള (എം.വി.പി) പുരസ്കാരം. ഈ ബഹുമതി തുടർച്ചയായി രണ്ട് സീസണുകളിൽ നേടുന്ന ആദ്യത്തെ താരം എന്ന ചരിത്രനേട്ടമാണ് മെസ്സി ഇതോടെ സ്വന്തമാക്കിയത്.
മെസ്സിയെ കൂടാതെ പ്രെഡ്ഡ്രാഗ് “പ്രെക്കി” റാഡോസാവ്ലേവിച്ച് മാത്രമാണ് രണ്ടുതവണ എം.വി.പി. ജേതാവായിട്ടുള്ള മറ്റൊരു താരം. മാധ്യമപ്രവർത്തകർ, കളിക്കാർ, ക്ലബ്ബുകൾ എന്നിവയുടെ സംയുക്ത വോട്ടിങ്ങിൽ 70% ലേറെ വോട്ടുകൾ നേടിയാണ് മെസ്സി ഒന്നാം സ്ഥാനം ഉറപ്പിച്ചത്.
ഗോളടിയിലും അസിസ്റ്റിലും മെസ്സി മാജിക് 2025 സീസണിൽ 28 മത്സരങ്ങളിൽ നിന്ന് 29 ഗോളുകൾ നേടി മെസ്സി ഗോൾഡൻ ബൂട്ട് സ്വന്തമാക്കി. കൂടാതെ 19 അസിസ്റ്റുകളും താരം നൽകി. തുടർച്ചയായ രണ്ടാം വർഷവും 36-ൽ അധികം ഗോൾ സംഭാവനകൾ നേടുന്ന ഏക എം.എൽ.എസ്. താരവും ലയണൽ മെസ്സി തന്നെയാണ്. റെക്കോർഡ് ട്രോഫിയുമായി മയാമിക്ക് കപ്പ് മെസ്സിയുടെ അവിസ്മരണീയമായ പ്രകടന മികവിലാണ് മയാമി അവരുടെ കന്നി എം.എൽ.എസ്. കപ്പ് നേടിയത്. ഡിസംബർ 6-ന് നടന്ന ഫൈനലിൽ വാങ്കൂവർ വൈറ്റ്ക്യാപ്സിനെ 3-1ന് പരാജയപ്പെടുത്തിയാണ് ഡേവിഡ് ബെക്കാമിൻ്റെ ഉടമസ്ഥതയിലുള്ള മിയാമി ഈ ചരിത്രനേട്ടം സ്വന്തമാക്കിയത്.
ഈ ഫൈനലിൽ മിയാമിയുടെ മൂന്നു ഗോളുകളിലും നേരിട്ടോ പരോക്ഷമായോ പങ്കാളിയായ മെസ്സി, സ്വന്തം കരിയറിലെ 48-ാം ട്രോഫി ആണ് നേടിയത്. ഇതോടെ ഫുട്ബോൾ ചരിത്രത്തിൽ ഏറ്റവും കൂടുതൽ ട്രോഫികൾ നേടിയ താരം എന്ന ലോക റെക്കോർഡും മെസ്സി തൻ്റെ പേരിലാക്കി.