കണ്ണൂർ: പയ്യന്നൂർ നഗരസഭയിലെ 36-ാം വാർഡിൽ മുൻ ബ്രാഞ്ച് സെക്രട്ടറിയായിരുന്ന സി. വൈശാഖിന്റെ വിജയം സിപിഐഎമ്മിന് കനത്ത തിരിച്ചടിയായി. വിമത സ്ഥാനാർത്ഥിയായി സ്വതന്ത്രനായി മത്സരിച്ചാണ് വൈശാഖ് വിജയം നേടിയത്.കാര നോർത്ത് ബ്രാഞ്ച് സെക്രട്ടറിയായിരുന്ന വൈശാഖിനെ ഡിവൈഎഫ്ഐ മേഖലാ വൈസ് പ്രസിഡന്റ് സ്ഥാനത്തുനിന്ന് നീക്കിയതോടെയാണ് അദ്ദേഹം പാർട്ടിയുമായി ഇടഞ്ഞത്. ഈ വാർഡിലെ എൽഡിഎഫ് സ്ഥാനാർത്ഥി കോൺഗ്രസ് എസിലെ പി. ജയൻ ആയിരുന്നു.
സ്ഥാനത്തുനിന്ന് നീക്കിയതിന് പിന്നിൽ ലോക്കൽ സെക്രട്ടറിയും മറ്റ് ചിലരുമാണെന്ന ആരോപണങ്ങൾ വൈശാഖ് ഉന്നയിച്ചിരുന്നു. ഡിവൈഎഫ്ഐ മേഖലാ കമ്മിറ്റി അംഗങ്ങൾ ഉൾപ്പെടെയുള്ളവർ കാരയിലെ ഡിവൈഎഫ്ഐ യൂണിറ്റ് ഭാരവാഹികളെ ഭീഷണിപ്പെടുത്തിയെന്നും, ഇതിൽ ഒരാൾക്കെതിരെ മാത്രമാണ് ഒൻപത് മാസം കഴിഞ്ഞ് പാർട്ടി നടപടിയെടുത്തതെന്നും വൈശാഖ് ആരോപിച്ചു.
വൈശാഖിന് പിന്തുണയുമായി കാര ഭാഗത്തെ മൂന്ന് ബ്രാഞ്ചുകളിലായി മുപ്പതോളം പാർട്ടി അംഗങ്ങൾ പാർട്ടിയുമായി അകന്നു നിന്നിരുന്നു. ഇവരുടെ പിന്തുണയാണ് വൈശാഖിനെ തിരഞ്ഞെടുപ്പിൽ മത്സരിക്കാൻ പ്രേരിപ്പിച്ചതും വിജയത്തിലേക്ക് എത്തിച്ചതും.
സംസ്ഥാനത്തെ 1,129 തദ്ദേശ സ്ഥാപനങ്ങളിലെ വോട്ടെണ്ണൽ 14 ജില്ലകളിലായി 244 കേന്ദ്രങ്ങളിലാണ് നടക്കുന്നത്.
രണ്ട് ഘട്ടങ്ങളിലായി നടന്ന തിരഞ്ഞെടുപ്പിൽ, 941 ഗ്രാമപഞ്ചായത്തുകളിലെ 17,337 വാർഡുകൾ, 152 ബ്ലോക്ക് പഞ്ചായത്തുകളിലെ 2,267 വാർഡുകൾ, 14 ജില്ലാ പഞ്ചായത്തുകളിലെ 346 വാർഡുകൾ, 86 നഗരസഭകളിലെ 3,205 വാർഡുകൾ, 6 കോർപ്പറേഷനുകളിലെ 421 വാർഡുകൾ എന്നിവിടങ്ങളിലേക്കാണ് ജനപ്രതിനിധികളെ തിരഞ്ഞെടുത്തത്.
ഈ വർഷത്തെ പോളിംഗ് ശതമാനം 73.68% ആണ്. 2020-ൽ ഇത് 75.95% ആയിരുന്നു. സംസ്ഥാനത്ത് ആകെ 2,10,79,021 പേരാണ് വോട്ട് രേഖപ്പെടുത്തിയത്.
ആദ്യഘട്ടം (ഡിസംബർ 9): തിരുവനന്തപുരം, കൊല്ലം, പത്തനംതിട്ട, ആലപ്പുഴ, ഇടുക്കി, കോട്ടയം, എറണാകുളം ജില്ലകളിൽ – 70.9% പോളിംഗ്.
രണ്ടാം ഘട്ടം (ഡിസംബർ 11): തൃശൂർ, പാലക്കാട്, മലപ്പുറം, കോഴിക്കോട്, വയനാട്, കണ്ണൂർ, കാസർകോട് ജില്ലകളിൽ – 76.08% പോളിംഗ്.
സംസ്ഥാനത്ത് ഏറ്റവും കൂടുതൽ പോളിംഗ് രേഖപ്പെടുത്തിയത് വയനാട് ജില്ലയിലാണ് (78.29%). ഇവിടെ 6,47,378 പേരിൽ 5,06,823 പേർ വോട്ട് ചെയ്തു.