നവാഡ: അന്ധവിശ്വാസവും കൂടോത്ര ആരോപണങ്ങളും വീണ്ടും ഒരു ജീവനെടുത്തു. ബീഹാറിലെ നവാഡ ജില്ലയിൽ മന്ത്രവാദം ആരോപിച്ച് 35 വയസ്സുള്ള കിരൺ ദേവി എന്ന യുവതിയെ അയൽവാസികൾ ക്രൂരമായി മർദ്ദിച്ചുകൊലപ്പെടുത്തി. ആക്രമണം തടയാൻ ശ്രമിച്ച മറ്റ് രണ്ട് സ്ത്രീകൾക്ക് ഗുരുതരമായി പരിക്കേറ്റു.
അയൽപക്കത്തെ ഒരു കുട്ടിക്ക് അസുഖം ബാധിച്ചതാണ് പ്രകോപനത്തിന് കാരണമായത്. കുട്ടിക്ക് അസുഖം വന്നത് കിരൺ ദേവി കൂടോത്രം ചെയ്തതുകൊണ്ടാണെന്ന് ആരോപിച്ചായിരുന്നു ബന്ധുക്കൾ കൂടിയായ അയൽവാസികളുടെ ആക്രമണം. എന്നാൽ കുട്ടിയെ പരിശോധിച്ച ഡോക്ടർമാർ അത് തലച്ചോറുമായി ബന്ധപ്പെട്ട രോഗമാണെന്ന് സ്ഥിരീകരിച്ചിരുന്നു. ഇത് വകവെക്കാതെയാണ് പ്രതികൾ അക്രമം അഴിച്ചുവിട്ടതെന്ന് കൊല്ലപ്പെട്ട യുവതിയുടെ ബന്ധു രേഖാ ദേവി പറഞ്ഞു.
ക്രൂരമായ മർദ്ദനം; ജീവൻ രക്ഷിക്കാനായില്ല.മുകേഷ് ചൗധരി, മഹേന്ദ്ര ചൗധരി, നട്രു ചൗധരി, ശോഭ ദേവി എന്നിവരടങ്ങുന്ന സംഘമാണ് അക്രമത്തിന് പിന്നിലെന്ന് പോലീസ് തിരിച്ചറിഞ്ഞു. ഇഷ്ടികകൾ, കല്ലുകൾ, ഇരുമ്പ് ദണ്ഡുകൾ എന്നിവ ഉപയോഗിച്ചായിരുന്നു മർദ്ദനം. ആക്രമണം തടയാൻ ശ്രമിച്ച ലളിതാ ദേവി ഉൾപ്പെടെയുള്ള മറ്റ് രണ്ട് സ്ത്രീകൾക്കും പരിക്കേറ്റു. ക്രൂരമായ മർദ്ദനത്തെത്തുടർന്ന് അമിത രക്തസ്രാവമുണ്ടായ കിരൺ ദേവിയെ ജില്ലാ ആശുപത്രിയിലേക്ക് കൊണ്ടുപോകും വഴിയാണ് മരണം സംഭവിച്ചത്.
സംഭവവുമായി ബന്ധപ്പെട്ട് മൂന്ന് പേരെ രജൗലി പോലീസ് കസ്റ്റഡിയിലെടുത്തു.രണ്ട് കുടുംബങ്ങൾ തമ്മിലുള്ള തർക്കമാണ് സംഘർഷത്തിൽ കലാശിച്ചതെന്ന് സ്റ്റേഷൻ ഹൗസ് ഓഫീസർ രഞ്ജിത് കുമാർ അറിയിച്ചു.കൊല്ലപ്പെട്ട കിരൺ ദേവിക്ക് നാല് മക്കളുണ്ട്.
നവാഡ ജില്ലയിൽ അന്ധവിശ്വാസത്തെത്തുടർന്നുള്ള അക്രമങ്ങൾ തുടർക്കഥയാവുകയാണ്. ഏകദേശം ഒന്നര വർഷം മുൻപ് ഇതേ രീതിയിൽ മന്ത്രവാദം ആരോപിച്ച് മറ്റൊരു സ്ത്രീയെ ജീവനോടെ കത്തിച്ച സംഭവം റിപ്പോർട്ട് ചെയ്തിരുന്നു. വിദ്യാഭ്യാസപരമായും ബോധവൽക്കരണപരമായും പിന്നോക്കം നിൽക്കുന്ന മേഖലകളിൽ ഇത്തരം അന്ധവിശ്വാസങ്ങൾ ഇന്നും കടുത്ത വെല്ലുവിളിയായി തുടരുകയാണ്.