ന്യൂഡൽഹി: ഇന്ത്യൻ സംസ്കാരത്തോടും ഭക്ഷണത്തോടുമുള്ള തന്റെ താൽപ്പര്യം പങ്കുവെച്ച് ജാപ്പനീസ് അംബാസഡർ ഓനോ കെയ്ച്ചി. ന്യൂഡൽഹിയിലെ ആന്ധ്രാ ഭവനിൽ നിന്നും ബിരിയാണി കഴിക്കുന്ന ചിത്രങ്ങളും വീഡിയോയുമാണ് അദ്ദേഹം എക്സിൽ (X) പങ്കുവെച്ചത്. കൈകൊണ്ട് ഭക്ഷണം കഴിക്കുന്ന പരമ്പരാഗത ഇന്ത്യൻ രീതിയെ ജപ്പാനിലെ പ്രശസ്തമായ ‘സുഷി’ കഴിക്കുന്നതിനോടാണ് അദ്ദേഹം താരതമ്യം ചെയ്തത്.
”ഇന്ത്യൻ സുഹൃത്തുക്കളെപ്പോലെ കൈകൊണ്ട് ബിരിയാണി കഴിക്കാൻ ശ്രമിച്ചു. സുഷി പോലെ, കൈകൊണ്ട് കഴിക്കുമ്പോൾ ഇതിന് കൂടുതൽ രുചിയാണ്. എന്റെ സുഹൃത്തുക്കളോട് ഇപ്പോൾ കൂടുതൽ അടുപ്പം തോന്നുന്നു!” – ഓനോ കെയ്ച്ചി.അടുത്തിടെ തെലങ്കാന സന്ദർശനത്തിനിടെ ഹൈദരാബാദി ബിരിയാണി കഴിച്ചതിന്റെ അനുഭവവും അദ്ദേഹം പങ്കുവെച്ചിരുന്നു. അതിലെ മസാലക്കൂട്ടുകളും വൈവിധ്യമാർന്ന രുചികളും തന്നെ അത്ഭുതപ്പെടുത്തിയെന്നും ആ രുചിക്ക് താൻ അടിമപ്പെട്ടെന്നും അദ്ദേഹം കുറിച്ചു.
സംസ്കാരത്തോടുള്ള ആദരം: ആയുർവേദത്തിൽ വേരൂന്നിയ കൈകൊണ്ട് ഭക്ഷണം കഴിക്കുന്ന രീതി ഇന്ത്യൻ സംസ്കാരത്തിന്റെ ഭാഗമാണ്. ഇത് ഭക്ഷണവുമായി കൂടുതൽ ബന്ധപ്പെടാൻ സഹായിക്കുമെന്ന് വിശ്വസിക്കപ്പെടുന്നു. ഈ പാരമ്പര്യത്തെ അംബാസഡർ ഹൃദയപൂർവ്വം സ്വീകരിച്ചത് വലിയ ചർച്ചയായിട്ടുണ്ട്.ഓനോ കെയ്ച്ചിയുടെ പോസ്റ്റ് നിമിഷങ്ങൾക്കകം വൈറലായി. മറ്റൊരു സംസ്കാരത്തെ ഇത്ര മനോഹരമായി സ്വീകരിച്ച അദ്ദേഹത്തെ അഭിനന്ദിച്ചുകൊണ്ട് നിരവധി ഇന്ത്യക്കാർ രംഗത്തെത്തി. “ഇതുകൊണ്ടാണ് ഇന്ത്യക്കാർക്ക് ജപ്പാൻകാരെ ഇത്രയധികം ഇഷ്ടപ്പെടുന്നത്” എന്നാണ് സോഷ്യൽ മീഡിയയിലെ പൊതുവെയുള്ള കമന്റുകൾ.