“ഞങ്ങളെ ഒതുക്കാനുള്ള പരിപാടിയാണല്ലേ”; ബേസിലിന്റെ പുതിയ ലുക്കിന് താഴെ നസ്ലിന്റെയും ടൊവിനോയുടെയും കമന്റ് പൂരം!

നസ്ലിന്റെയും ടൊവിനോയുടെയും കമന്റ് പൂരം!
​കൊച്ചി: സോഷ്യൽ മീഡിയയിലെ തമാശക്കാരായ കൂട്ടുകെട്ടാണ് ബേസിൽ ജോസഫും ടൊവിനോ തോമസും വിനീത് ശ്രീനിവാസനും. കഴിഞ്ഞ ദിവസം ബേസിൽ ഇൻസ്റ്റാഗ്രാമിൽ പങ്കുവെച്ച തന്റെ പുതിയ ചിത്രത്തിന് താഴെ താരങ്ങളുടെ കമന്റുകൾ കൊണ്ട് നിറയുകയാണ്. കോളേജ് വിദ്യാർത്ഥിയെ വെല്ലുന്ന സ്റ്റൈലിഷ് ലുക്കിലുള്ള ബേസിലിന്റെ ചിത്രമാണ് ഈ രസകരമായ പോരിന് തുടക്കമിട്ടത്.

യുവനടൻ നസ്ലിന്റെ കമന്റാണ് ഏറ്റവും ശ്രദ്ധിക്കപ്പെട്ടത്. “ഞങ്ങളെ ഒതുക്കാനുള്ള പരിപാടിയാണല്ലേ” എന്നായിരുന്നു നസ്ലിന്റെ ചോദ്യം. ഇതിന് കൃത്യമായ മറുപടിയുമായി ടൊവിനോയും എത്തി. “നീയാണ് അവന്റെ മെയിൻ ലക്ഷ്യം” എന്നാണ് ടൊവിനോ നസ്ലിന് മറുപടി നൽകിയത്.
​മറ്റൊരു കമന്റിൽ ബേസിലിന്റെ പ്രായം കുറഞ്ഞ ലുക്കിനെ സൂചിപ്പിച്ച് ‘എയ്ജ് ഇൻ റിവേഴ്‌സ് ഗിയർ’ എന്നും ടൊവിനോ കുറിച്ചു. “പൊളിച്ചു ഡാ മുത്തേ, കമോൺ ഡാ” എന്ന കമന്റുമായി നസ്രിയയും ബേസിലിന് പിന്തുണ അറിയിച്ച് എത്തിയിട്ടുണ്ട്.

ടൊവിനോ തോമസും ബേസിൽ ജോസഫും വിനീത് ശ്രീനിവാസനും പ്രധാന വേഷങ്ങളിലെത്തുന്ന പുതിയ ചിത്രത്തിലെ ക്യാരക്ടർ ലുക്കാണ് ബേസിൽ പങ്കുവെച്ചത്. ഗംഭീര മേക്കോവറിലുള്ള ചിത്രം നിമിഷങ്ങൾക്കകം തന്നെ വൈറലായി. ഇവരുടെ സൗഹൃദവും ഒന്നിനോടൊന്നു മെച്ചപ്പെട്ട തമാശകളും മുൻപും സോഷ്യൽ മീഡിയയിൽ വലിയ ചർച്ചകൾക്ക് വഴിവെച്ചിട്ടുണ്ട്.