വൈകിയെത്തിയ വിദ്യാര്ഥിയെ സ്കൂള് അധികൃതര് ഇരുട്ടുമുറിയില് അടച്ചെന്ന് പരാതി. സംഭവത്തില് രക്ഷിതാക്കളും വിവിധ വിദ്യാര്ഥി സംഘടനകളും സ്കൂളിലെത്തി പ്രതിഷേധിച്ചു. കുട്ടിയെ വൈകിയെത്തിയതിന്റെ പേരില് വെയിലത്ത് ഗ്രൗണ്ടില് ഓടിച്ചു, ശേഷം ഇരുട്ട് മുറിയില് ഒറ്റയ്ക്ക് ഇരുത്തി. കൂടാതെ രക്ഷിതാക്കളെ വിളിച്ചുവരുത്തുകയും ചെയ്തെന്നാണ് ആക്ഷേപം. കുട്ടിയുടെ ടിസി തന്നുവിടുമെന്ന് അധികൃതര് പറഞ്ഞതായും രക്ഷിതാക്കള് ആരോപിച്ചു. സംഭവത്തില് പ്രതിഷേധവുമായി രംഗത്തെത്തിയ കുട്ടിയുടെ രക്ഷിതാക്കളും ബന്ധുക്കളും സ്കൂള് അധികൃതരുമായി തര്ക്കമുണ്ടായി. സ്കൂള് പ്രിന്സിപ്പലിനെതിരെ നടപടി വേണമെന്നാണ് രക്ഷിതാക്കളുടെ ആവശ്യം. എന്നാല് കുട്ടിയെ ഓടിച്ചത് വ്യായാമത്തിന്റെ ഭാഗമായാണെന്നും ശിക്ഷിച്ചിട്ടില്ലെന്നുമാണ് സ്കൂള് അധികൃതരുടെ വാദം.
അതേസമയം, സംഭവത്തില് വിദ്യാഭ്യാസ വകുപ്പ് അന്വേഷണം പ്രഖ്യാപിച്ചു. സംസ്ഥാനത്തെ ഒരു സ്കൂളിലും കുട്ടികള്ക്കെതിരെയുള്ള ഒരു വിവേചനവും ഒരു കാരണവശാലും അനുവദിക്കില്ലെന്ന് പൊതുവിദ്യാഭ്യാസ മന്ത്രി വി ശിവന്കുട്ടി വ്യക്തമാക്കി. സംഭവത്തെക്കുറിച്ച് അന്വേഷിച്ച് അടിയന്തിര റിപ്പോര്ട്ട് സമര്പ്പിക്കാന് എറണാകുളം വിദ്യാഭ്യാസ ഉപഡയറക്ടര്ക്ക് നിര്ദ്ദേശം മന്ത്രി നല്കി. റിപ്പോര്ട്ട് ലഭിച്ചതിന് ശേഷം കൂടുതല് നടപടികള് സ്വീകരിക്കുമെന്നും വി ശിവന്കുട്ടി ഫെയ്സ്ബുക്ക് പോസ്റ്റില് അറിയിച്ചു
