ലാഹോർ: പാകിസ്താൻ മുൻ പ്രധാനമന്ത്രി നവാസ് ഷെരീഫിന്റെ കൊച്ചുമകൻ ജുനൈദ് സഫ്ദറിന്റെ വിവാഹം ലാഹോറിൽ അതിഗംഭീരമായി നടന്നു. നവാസ് ഷെരീഫിന്റെ അടുത്ത സുഹൃത്തും രാഷ്ട്രീയ നേതാവുമായ റൊഹൈൽ അസ്ഗറിന്റെ കൊച്ചുമകൾ ഷാൻസായ് അലി റൊഹൈലിയെയാണ് ജുനൈദ് വിവാഹം ചെയ്തത്. എന്നാൽ വിവാഹച്ചിത്രങ്ങൾ പുറത്തുവന്നതോടെ വധുവിനേക്കാൾ കൂടുതൽ ചർച്ചയായത് വരന്റെ മാതാവായ മറിയം നവാസിന്റെ വസ്ത്രധാരണമാണ്.
മഞ്ഞയും ഓറഞ്ചും കലർന്ന മനോഹരമായ ലെഹങ്കയാണ് മറിയം ധരിച്ചിരുന്നത്. വിവാഹദിനത്തിൽ പച്ച നിറത്തിലുള്ള പരമ്പരാഗത ഡിസൈനർ ഔട്ട്ഫിറ്റിലാണ് അവർ എത്തിയത്. ആഭരണങ്ങളിലും ഹെയർസ്റ്റൈലിലും വധുവിനെ അനുസ്മരിപ്പിക്കുന്ന രീതിയിലുള്ള ആഡംബര ശൈലിയാണ് മറിയം സ്വീകരിച്ചത്.
മറിയം നവാസിന്റെ ചിത്രങ്ങൾ വൈറലായതോടെ വലിയ രീതിയിലുള്ള ചർച്ചകളാണ് ഇന്റർനെറ്റിൽ നടക്കുന്നത്.
വിമർശനം: ഒരു വിവാഹത്തിൽ ഏറ്റവും കൂടുതൽ ശ്രദ്ധിക്കപ്പെടേണ്ടത് വധുവാണെന്നും മറ്റൊരാൾ വധുവിനെപ്പോലെ ഒരുങ്ങുന്നത് ശരിയല്ലെന്നും പലരും അഭിപ്രായപ്പെട്ടു. വധുവാകാനുള്ള മറിയത്തിന്റെ ഭ്രമമാണ് ഇതിലൂടെ പ്രകടമാകുന്നതെന്ന് ചിലർ കുറിച്ചു. അതേസമയം, മകന്റെ വിവാഹത്തിന് ഏറ്റവും സുന്ദരിയായിരിക്കാൻ ഏതൊരു അമ്മയ്ക്കും അവകാശമുണ്ടെന്നും മറിയത്തിന്റെ വസ്ത്രധാരണം ഏറെ മനോഹരമാണെന്നും ആരാധകർ വാദിക്കുന്നു.
