മഹാരാഷ്ട്രയിലെ കാർഷിക മേഖല നേരിടുന്ന പ്രതിസന്ധിയുടെയും പലിശക്കാരുടെ ക്രൂരതയുടെയും ഞെട്ടിക്കുന്ന വിവരങ്ങളാണ് ചന്ദ്രാപൂരിൽ നിന്ന് പുറത്തുവരുന്നത്. കടബാധ്യത തീർക്കാൻ പണമിടപാടുകാരുടെ നിർബന്ധത്തിന് വഴങ്ങി സ്വന്തം വൃക്ക വിൽക്കേണ്ടി വന്ന കർഷകന്റെ അനുഭവം മനസാക്ഷിയെ മരവിപ്പിക്കുന്നതാണ്. ചന്ദ്രാപൂർ ജില്ലയിലെ നാഗ്ഭിഡ് താലൂക്കിലെ മിന്തൂർ ഗ്രാമത്തിലാണ് ഈ ദാരുണ സംഭവം നടന്നത്.
കടക്കെണിയിലേക്ക് വീണ വഴി മിന്തൂർ ഗ്രാമത്തിലെ കർഷകനായ റോഷൻ സദാശിവ് കുഡെയാണ് ഈ കൊടും ക്രൂരതയ്ക്ക് ഇരയായത്. ഇദ്ദേഹത്തിന് സ്വന്തമായി നാല് ഏക്കർ കൃഷിഭൂമിയുണ്ടെങ്കിലും, മോശം കാലാവസ്ഥയും മറ്റ് പ്രതികൂല സാഹചര്യങ്ങളും കാരണം കൃഷിയിൽ നിന്ന് പ്രതീക്ഷിച്ച വരുമാനം ലഭിച്ചില്ല. തുടർന്ന് ഉപജീവനത്തിനായി ക്ഷീരവ്യവസായം തുടങ്ങാൻ തീരുമാനിക്കുകയും, ഇതിനായി 2021-ൽ പ്രാദേശിക പണമിടപാടുകാരിൽ നിന്ന് 40 ശതമാനം പലിശയ്ക്ക് ഒരു ലക്ഷം രൂപ വായ്പ എടുക്കുകയും ചെയ്തു. എന്നാൽ, വാങ്ങിയ പശുക്കൾ ചത്തതോടെ റോഷന്റെ പ്രതീക്ഷകൾ തകരുകയും കടബാധ്യത കുത്തനെ ഉയരുകയും ചെയ്തു.
അമിത പലിശ: തിരിച്ചടവ് മുടങ്ങിയതോടെ പണമിടപാടുകാർ ഭീമമായ പലിശയും പിഴയും ചുമത്തി. ഇതോടെ വായ്പ തിരിച്ചടച്ചിട്ടും കടം നാലിരട്ടിയായി വർധിച്ചു.
തുടർച്ചയായ ഭീഷണി: പണമിടപാടുകാർ വീട്ടിലെത്തി സ്ഥിരമായി ഭീഷണിപ്പെടുത്താനും ശല്യം ചെയ്യാനും തുടങ്ങി. കടം വീട്ടാനായി റോഷൻ തന്റെ ഭൂമിയുടെ ഒരു ഭാഗം, ട്രാക്ടർ, വീട്ടുപകരണങ്ങൾ എന്നിവ വിറ്റെങ്കിലും ബാധ്യത തീർന്നില്ല.
ശസ്ത്രക്രിയ: ഒടുവിൽ, പണമിടപാടുകാരിൽ ഒരാൾ കടം തീർക്കാൻ വൃക്ക വിൽക്കാൻ നിർബന്ധിച്ചു. ഒരു ഏജന്റിന്റെ സഹായത്തോടെ ഇക്കഴിഞ്ഞ ഒക്ടോബറിൽ റോഷനെ കൊൽക്കത്തയിൽ കൊണ്ടുപോയി ശസ്ത്രക്രിയ നടത്തിയതായാണ് വിവരം.
സംഭവം പുറത്തറിഞ്ഞതോടെ പോലീസ് ശക്തമായ നടപടികളുമായി രംഗത്തെത്തി. ചന്ദ്രാപൂർ പോലീസ് സൂപ്രണ്ട് സുദർശൻ മുമാക്കയുടെ നേതൃത്വത്തിൽ അന്വേഷണം ആരംഭിച്ചു. പണമിടപാടുകാർക്കെതിരെ കൊള്ളയടിക്കൽ, മഹാരാഷ്ട്ര മണി ലെൻഡിംഗ് (റെഗുലേഷൻ) ആക്ട് എന്നിവ പ്രകാരം ബ്രഹ്മപുരി പോലീസ് സ്റ്റേഷനിൽ കേസ് രജിസ്റ്റർ ചെയ്തിട്ടുണ്ട്.
പ്രതികൾ ഇവരാണ്:
കിഷോർ ബവൻകുലെ
മനീഷ് ഘട്ബഝെ
ലക്ഷ്മൺ ഉർകുഡെ
പ്രദീപ് ബവൻകുലെ
സഞ്ജയ് ബല്ലാർപുരെ
സത്യവാൻ ബോർക്കർ
ഇന്ത്യയിലെ കാർഷിക മേഖല നേരിടുന്ന അതീവ ഗുരുതരമായ പ്രതിസന്ധിയുടെയും, കർഷകർ അനുഭവിക്കുന്ന ചൂഷണത്തിന്റെയും നേർക്കാഴ്ചയാവുകയാണ് ഈ സംഭവം.