വാഷിങ്ടൺ ഡി.സി. – റഷ്യൻ പ്രസിഡൻ്റ് വ്ളാഡിമിർ പുട്ടിൻ ഇന്ത്യ സന്ദർശിച്ചപ്പോൾ, പ്രധാനമന്ത്രി നരേന്ദ്ര മോദിയുമായി ചേർന്ന് ഒരേ കാറിൽ യാത്ര ചെയ്ത സംഭവം യുഎസ് കോൺഗ്രസിലും ശക്തമായ ചർച്ചയായി. ഈ ചിത്രത്തിൻ്റെ പ്രാധാന്യം ഉയർത്തിക്കാട്ടിക്കൊണ്ട് യുഎസ് പ്രതിനിധി സിഡ്നി കാംലാഗർ ഡോവ്, ഡോണൾഡ് ട്രംപ് ഭരണകൂടത്തിൻ്റെ ഇന്ത്യാ നയങ്ങളെ രൂക്ഷമായി വിമർശിച്ചു.
ഹൗസിലെ സൗത്ത് ആൻഡ് സെൻട്രൽ ഏഷ്യ ഫോറിൻ അഫയേഴ്സ് സബ്കമ്മിറ്റിയിൽ ‘ദി യുഎസ് – ഇന്ത്യ സ്ട്രാറ്റീജിക് പാർട്നർഷിപ്: സെക്യുറിങ് എ ഫ്രീ ആൻഡ് ഓപ്പൺ ഇൻഡോ-പസിഫിക്’ എന്ന വിഷയത്തിൽ നടന്ന ചർച്ചയിലാണ് സംഭവം.ഇന്ത്യയോടുള്ള ട്രംപിൻ്റെ നയങ്ങളെ ഡോവ് വിശേഷിപ്പിച്ചത് ഇങ്ങനെയാണ്: “നമുക്ക് ദേഷ്യമുള്ള ആളുകളെ വേദനിപ്പിക്കുന്നതിനേക്കാൾ കൂടുതൽ, നമ്മൾ നമ്മെത്തന്നെയാണ് വേദനിപ്പിക്കുന്നത്. നിർബന്ധബുദ്ധിയുള്ള ഒരു പങ്കാളിയാകുന്നതിന് വലിയ വില നൽകേണ്ടിവരും.”
ചിത്രം ഉയർത്തിക്കാട്ടി ഡോവ് പറഞ്ഞു: “ഈ പോസ്റ്ററിന് ആയിരം വാക്കുകളേക്കാൾ വിലയുണ്ട്.”
”യുഎസ്സിൻ്റെ തന്ത്രപ്രധാന പങ്കാളികളെ നമ്മുടെ ശത്രുക്കളുടെ കൈകളിലേക്ക് തള്ളിവിട്ടുകൊണ്ട് നിങ്ങൾക്ക് സമാധാനത്തിനുള്ള നൊബേൽ സമ്മാനം ലഭിക്കില്ല. ഈ ഭരണകൂടം യുഎസ്-ഇന്ത്യാ പങ്കാളിത്തത്തിന് വരുത്തിവെച്ച നാശനഷ്ടങ്ങൾ ലഘൂകരിക്കുന്നതിനും യുഎസിൻ്റെ അഭിവൃദ്ധി, സുരക്ഷ, ആഗോള നേതൃത്വം എന്നിവയ്ക്ക് അത്യന്താപേക്ഷിതമായ സഹകരണത്തിലേക്ക് മടങ്ങുന്നതിനും അടിയന്തരമായി നാം നീക്കം നടത്തണം,” ഡോവ് കൂട്ടിച്ചേർത്തു.
ഈ വർഷം ഓഗസ്റ്റിൽ ഇന്ത്യയിൽനിന്നുള്ള കയറ്റുമതികൾക്ക് ട്രംപ് ഭരണകൂടം 50% തീരുവ ചുമത്തിയത് ഇരു രാജ്യങ്ങളും തമ്മിലുള്ള ബന്ധം വഷളാക്കിയിരുന്നു. കഴിഞ്ഞ 10-11 തീയതികളിൽ യുഎസ് പ്രതിനിധി സംഘം ഇന്ത്യയിൽ ചർച്ചകൾക്കായി എത്തിയിരുന്നെങ്കിലും, വിപണി പ്രവേശനം, താരിഫ് നയങ്ങൾ എന്നിവയെച്ചൊല്ലിയുള്ള തർക്കങ്ങൾ കാരണം ചർച്ചകളിൽ കാര്യമായ പുരോഗതി ഉണ്ടാക്കാൻ സാധിച്ചിട്ടില്ല.