കൊച്ചി: ബജറ്റ് ടൂറിസത്തിന്റെ ഭാഗമായി ആരംഭിച്ച കൊച്ചി സിറ്റി റൈഡ് ഡബിള് ഡക്കര് യാത്രാ നിരക്ക് കുറച്ച് കെഎസ്ആര്ടിസി. കൂടാതെ ട്രിപ്പുകളുടെ എണ്ണത്തിലും വര്ധന. ഇനി മുതല് മൂന്ന് ട്രിപ്പുകളാണ് ദിവസവും ഉണ്ടാകുക. ജെട്ടി സ്റ്റാന്ഡില് നിന്നാരംഭിച്ച് ഗോശ്രീപാലം കടന്ന് കാളമുക്കിലെത്തി തിരിച്ച് ഹൈക്കോര്ട്ട് വഴി എം ജി റോഡിലൂടെ ജോസ് ജങഷന്, തേവര വഴി കോപ്റ്റ് അവന്യു എത്തി ഷിപ്പ്യാര്ഡ്, മഹാരാജാസ് കോളേജ്, സുഭാഷ് പാര്ക്ക് വഴി ജെട്ടിയില് തിരിച്ചെത്തുന്ന തരത്തിലാണ് ട്രിപ്പ് ക്രമീകരിച്ചിരിക്കുന്നത്.
ഡബിള് ഡക്കര് അപ്പര് ഡക്ക് നിരക്ക് മുമ്പ് 300 രൂപയായിരുന്നതില് നിന്ന് 200 രൂപയായും 150 രൂപയായിരുന്ന ലോവര്ഡക്ക് നിരക്ക് 100 രൂപ എന്നിങ്ങനെയാണ് ഇളവ് വരുത്തിയത്. നിലവില് സര്വീസിന് ശേഷം നിരത്തിലിറങ്ങിയ ബസിലാണ് പുതിയ നിരക്കില് ടിക്കറ്റ് ലഭിക്കുക. അതുപോലെ, ദിവസവും വൈകുന്നേരം 4-ന് എറണാകുളം ജെട്ടി സ്റ്റാന്ഡില് നിന്ന് ആദ്യ ട്രിപ്പും 6.30-ക്കും 9-നും രണ്ടാമത്തേയും മൂന്നാമത്തെയും ട്രിപ്പുമാണ് പുതുതായി നിശ്ചയിച്ചിട്ടുള്ള സമയക്രമം. നേരത്തെ, വൈകിട്ട് 5 മണിയ്ക്ക് മാത്രമാണ് ഡബിള് ഡക്കര് ട്രിപ്പ് ഉണ്ടായിരുന്നത്. കൂടുതല് യാത്രക്കാരെ ആകര്ഷിക്കുന്നതിനും സൗകര്യപ്രദമാക്കുന്നതിനുമായി മന്ത്രി ഗണേഷ് കുമാറിന്റെ പ്രത്യേക നിര്ദേശപ്രകാരമാണ് നിരക്കിലും ട്രിപ്പിലും മാറ്റം വരുത്തിയത്.