ഹോളിവുഡ് സിനിമാ ചരിത്രത്തിലെ ഏറ്റവും വലിയ ലയന നീക്കങ്ങളിൽ ഒന്നായ വാർണർ ബ്രദേഴ്സ് – ഡിസ്കവറി (WBD) ഏറ്റെടുക്കൽ നടപടികൾ പുതിയ ഘട്ടത്തിലേക്ക്. എതിരാളികളായ പാരമൗണ്ട് ഗ്ലോബൽ മുന്നോട്ട് വച്ച 108 ബില്യൺ ഡോളറിന്റെ (ഏകദേശം 9.7 ലക്ഷം കോടി രൂപ) വമ്പൻ ഓഫർ നിരസിച്ച വാർണർ ബ്രദേഴ്സ്, നെറ്റ്ഫ്ലിക്സുമായി കൈകോർക്കാൻ തീരുമാനിച്ചു.
വാർണർ ബ്രദേഴ്സിന്റെ ബോർഡ് അംഗങ്ങൾ പാരമൗണ്ടിന്റെ നീക്കം തള്ളിക്കളയാൻ പ്രധാനമായും മൂന്ന് കാരണങ്ങളാണുള്ളത്:
നെറ്റ്ഫ്ലിക്സിന്റെ വിശ്വാസ്യത: 72 ബില്യൺ ഡോളറിന്റെ ഓഫറാണ് നെറ്റ്ഫ്ലിക്സ് മുന്നോട്ട് വച്ചതെങ്കിലും, കമ്പനിയുടെ നിലവിലെ വളർച്ചയും സാമ്പത്തിക ഭദ്രതയും ബോർഡിന് കൂടുതൽ തൃപ്തികരമായി തോന്നി.
സാമ്പത്തിക ഉറപ്പിന്റെ കുറവ്: പാരമൗണ്ടിന് പിന്നിൽ ശതകോടീശ്വരൻ ലാറി എല്ലിസണിന്റെ പിന്തുണയുണ്ടെന്ന് കരുതിയിരുന്നെങ്കിലും, കൃത്യമായ രേഖാമൂലമുള്ള ഉറപ്പുകൾ ലഭിക്കാത്തത് തിരിച്ചടിയായി.
നഷ്ടസാധ്യത: പാരമൗണ്ടിന്റെ ഓഫറിൽ വലിയ സാമ്പത്തിക റിസ്ക് ഉണ്ടെന്ന് ബോർഡ് വിലയിരുത്തി.
ഒക്ടോബറിൽ വിൽപനയ്ക്ക് വച്ച വാർണർ ബ്രദേഴ്സിനെ ഡിസംബർ 5-നാണ് നെറ്റ്ഫ്ലിക്സ് സ്വന്തമാക്കുന്നതായി ഔദ്യോഗിക പ്രഖ്യാപനം വന്നത്. ഇതോടെ ഡിസി (DC) സിനിമകളും മറ്റു പ്രമുഖ ഫ്രാഞ്ചൈസികളും സ്ട്രീമിംഗ് പ്ലാറ്റ്ഫോമിന് കീഴിലാകുന്നത് സിനിമകളുടെ ക്വാളിറ്റിയെയും ഉള്ളടക്കത്തെയും എങ്ങനെ ബാധിക്കുമെന്ന ആശങ്കയിലാണ് ആരാധകർ. ഹോളിവുഡിന്റെ പാരമ്പര്യം സ്ട്രീമിംഗ് സംസ്കാരത്തിന് വഴിമാറുമോ എന്ന ചോദ്യമാണ് ഇപ്പോൾ സിനിമാ ലോകത്ത് ഉയരുന്നത്.