തൂപ്പാക്കി വില്ലൻ ഇനി ആഗോള താരം. തമിഴ് സിനിമയിലെ സൂപ്പർ ഹിറ്റ് ചിത്രം ‘തുപ്പാക്കി’യിലെ വില്ലൻ കഥാപാത്രത്തിലൂടെ ശ്രദ്ധേയനായ നടൻ വിദ്യുത് ജംവാൽ ഹോളിവുഡിൽ തകർപ്പൻ അരങ്ങേറ്റത്തിന് ഒരുങ്ങുന്നു.
കിറ്റാകോ സകുരായ് സംവിധാനം ചെയ്യുന്ന ബ്രഹ്മാണ്ഡ ഹോളിവുഡ് ആക്ഷൻ ചിത്രമായ ‘സ്ട്രീറ്റ് ഫൈറ്റർ’ (Street Fighter) ലൂടെയാണ് വിദ്യുത് ജംവാൽ അന്താരാഷ്ട്ര സിനിമയിലേക്ക് കടക്കുന്നത്.
പ്രശസ്ത വീഡിയോ ഗെയിം സീരീസായ കാപ്കോമിന്റെ ‘സ്ട്രീറ്റ് ഫൈറ്റ്’ നെ ആസ്പദമാക്കിയാണ് ഈ ബിഗ് ബജറ്റ് ചിത്രം ഒരുങ്ങുന്നത്. ചിത്രത്തിൽ വിദ്യുത് അവതരിപ്പിക്കുന്നത് ഏറെ ആകാംക്ഷയോടെ കാത്തിരിക്കുന്ന ‘ധൽസിം’ എന്ന കഥാപാത്രത്തെയാണ്.കഴിഞ്ഞ ദിവസം പുറത്തുവിട്ട വിദ്യുതിൻ്റെ ഫസ്റ്റ് ലുക്ക് പോസ്റ്റർ ഇതിനോടകം തന്നെ സോഷ്യൽ മീഡിയയിൽ തരംഗമായിക്കഴിഞ്ഞു. മുടി മൊട്ടയടിച്ച്, ശരീരമാസകലം വ്യത്യസ്തമായ ആഭരണങ്ങളോടും പ്രത്യേക വേഷപ്പകർച്ചയോടുമാണ് നടൻ ഈ കഥാപാത്രത്തെ അവതരിപ്പിക്കുന്നത്. വിദ്യുതിൻ്റെ ആക്ഷൻ രംഗങ്ങളിലെ പ്രകടനം എങ്ങനെയായിരിക്കുമെന്നറിയാനുള്ള കാത്തിരിപ്പിലാണ് പ്രേക്ഷകർ.
ചിത്രത്തിൽ വിദ്യുത് ജംവാൽ കൂടാതെ വൻ താരനിര അണിനിരക്കുന്നുണ്ട്. ജേസൺ മൊമൊവ, നോഹ സെൻ്റിനിയോ, കലിന ലിയാങ്, ആൻഡ്രൂ കോജി, റോമൻ റെയിൻസ്, ഡേവിഡ് ഡാസ്റ്റ്മാൽചിയൻ, കോഡി റോഡ്സ്, ആൻഡ്രൂ ഷൂൾസ് എന്നിവരാണ് പ്രധാന അഭിനേതാക്കൾ.
സിനിമ ആസ്വാദക ലോകം ഏറെ പ്രതീക്ഷയോടെ കാത്തിരിക്കുന്ന ഈ ചിത്രം 2026 ഒക്ടോബർ 16 ന് റിലീസ് ചെയ്യും.