ഡൽഹി: കാന്തപുരം എപി അബൂബക്കർ മുസല്യാർ പ്രധാനമന്ത്രി നരേന്ദ്ര മോദിയുമായി നടത്തിയ കൂടിക്കാഴ്ചയിൽ ദേശീയ സുരക്ഷാ ഉപദേഷ്ടാവ് അജിത് ഡോവൽയും പങ്കെടുത്തു. യെമനിൽ ജയിലിൽ കഴിയുന്ന മലയാളി നിമിഷപ്രിയയുടെ മോചനത്തിനായുള്ള ഇടപെടലുകളുമായി ബന്ധപ്പെട്ട ചർച്ചകളാണ് പ്രധാനമായി നടന്നതെന്നാണ് വിവരം.
നിമിഷപ്രിയയുടെ മോചനത്തിനായി കേന്ദ്ര സർക്കാർ മുൻകയ്യെടുക്കണമെന്ന് കാന്തപുരം ആവശ്യപ്പെട്ടു. എസ്.ഐ.ആർ. സംബന്ധിച്ച ആശങ്കകളും അദ്ദേഹം പ്രധാനമന്ത്രിയുമായി പങ്കുവെച്ചതായി റിപ്പോർട്ടുകൾ സൂചിപ്പിക്കുന്നു. സാമൂഹിക, മാനുഷിക, വിദ്യാഭ്യാസ, വികസന വിഷയങ്ങളും ന്യൂനപക്ഷ ക്ഷേമവും അന്തർദേശീയ സംഭവവികാസങ്ങളും കൂടിക്കാഴ്ചയിൽ ചർച്ചയായി.
പ്രധാനമന്ത്രിയുടെ വസതിയിൽ നടന്ന കൂടിക്കാഴ്ചയിൽ രാഷ്ട്രീയ വിഷയങ്ങൾ ചർച്ച ചെയ്തിട്ടില്ലെന്ന് കാന്തപുരം വ്യക്തമാക്കി. നിയമസഭാ തിരഞ്ഞെടുപ്പ് നിലപാട് സംബന്ധിച്ച് സമസ്ത ഇതുവരെ തീരുമാനമെടുത്തിട്ടില്ലെന്നാണ് റിപ്പോർട്ട്. കേരളത്തിലെ ജനകീയ പ്രശ്നങ്ങൾ പ്രധാനമന്ത്രിക്ക് മുന്നിൽ അവതരിപ്പിച്ചതായും കേന്ദ്ര പരിധിയിൽ വരുന്ന വിഷയങ്ങളിൽ ഇടപെട്ട് പരിഹാരം കാണുമെന്ന് മോദി ഉറപ്പ് നൽകിയതായും കാന്തപുരം അറിയിച്ചു.