കോടതി വിധിക്ക് പിന്നാലെ കണ്ണീരായി ഒരു കുടുംബം: പയ്യന്നൂരിൽ രണ്ടു കുഞ്ഞുങ്ങളടക്കം നാലുപേർ മരിച്ചനിലയിൽ

പയ്യന്നൂർ രാമന്തളിയിൽ ഒരു കുടുംബത്തിലെ നാലുപേരെ വീടിനുള്ളിൽ മരിച്ചനിലയിൽ കണ്ടെത്തി. കുടുംബ തർക്കത്തെത്തുടർന്നുള്ള കോടതി വിധി വന്നതിന് തൊട്ടുപിന്നാലെയാണ് ഈ ദാരുണ സംഭവം അരങ്ങേറിയത്.
​മരിച്ചവർ:
​കലാധരൻ (36)
​ഉഷ (56) – കലാധരന്റെ മാതാവ്
​ഹിമ (6) – കലാധരന്റെ മകൾ
​കണ്ണൻ (2) – കലാധരന്റെ മകൻ

​രാമന്തളി സെന്ററിൽ വടക്കുമ്പാട് റോഡിലെ കൊയിത്തട്ട താഴത്തെവീട്ടിലാണ് മൃതദേഹങ്ങൾ കണ്ടെത്തിയത്. ഉഷയെയും കലാധരനെയും കിടപ്പുമുറിയിൽ തൂങ്ങിമരിച്ച നിലയിലും, കുഞ്ഞുങ്ങളെ നിലത്ത് മരിച്ചുകിടക്കുന്ന നിലയിലുമാണ് കണ്ടെത്തിയത്. കുഞ്ഞുങ്ങൾക്ക് വിഷം നൽകിയ ശേഷം മുതിർന്നവർ ജീവനൊടുക്കിയതാകാമെന്നാണ് പൊലീസിന്റെ പ്രാഥമിക നിഗമനം.
​
​കലാധരനും ഭാര്യയും തമ്മിൽ കുടുംബക്കോടതിയിൽ കേസ് നിലവിലുണ്ടായിരുന്നു. കുട്ടികളെ ഭാര്യയ്‌ക്കൊപ്പം വിടാനായിരുന്നു കോടതി വിധി. കോടതി വിധിയനുസരിച്ച് കുട്ടികളെ ഇന്ന് (ചൊവ്വാഴ്ച) വിട്ടുകൊടുക്കണമെന്ന് പൊലീസ് കലാധരന്റെ പിതാവ് ഉണ്ണിക്കൃഷ്ണനോട് നിർദേശിച്ചിരുന്നു. ഇതിനുപിന്നാലെയാണ് രാത്രിയോടെ മരണം സംഭവിച്ചത്.

​ഉഷയുടെ ഭർത്താവ് ഉണ്ണിക്കൃഷ്ണൻ ജോലി കഴിഞ്ഞ് രാത്രി വീട്ടിലെത്തിയപ്പോഴാണ് വീട് പൂട്ടിയ നിലയിൽ കണ്ടത്.
​സിറ്റൗട്ടിൽ നിന്നും ലഭിച്ച ആത്മഹത്യക്കുറിപ്പ് ഉണ്ണിക്കൃഷ്ണൻ സ്റ്റേഷനിൽ എത്തിച്ചതിനെത്തുടർന്ന് പൊലീസെത്തി വീട് തുറന്നപ്പോഴാണ് ദുരന്തം പുറംലോകമറിഞ്ഞത്.കണ്ണൂർ റൂറൽ എസ്.പി. അനൂജ് പലിവാളിന്റെ നേതൃത്വത്തിലുള്ള സംഘം സ്ഥലത്തെത്തി അന്വേഷണം ആരംഭിച്ചു.അപ്രതീക്ഷിതമായ ഈ ദുരന്തത്തിന്റെ ആഘാതത്തിലാണ് പയ്യന്നൂർ ഗ്രാമം.