സര്ക്കാര് മേഖലയിലെ നാലാമത്തെ ആയുര്വേദ മെഡിക്കല് കോളേജ് ഇടുക്കി ജില്ലയില് ആരംഭിക്കുന്നു. ഇടുക്കി വികസന പാക്കേജില് അനുവദിച്ച 10 കോടി രൂപ ഉപയോഗപ്പെടുത്തിയാണ് പദ്ധതി പൂർത്തീകരിക്കുന്നത്. ആദ്യഘട്ടത്തില് ‘പ്രസൂതിതന്ത്ര- സ്ത്രീരോഗ ചികിത്സ, ശല്യതന്ത്ര ഓര്ത്തോപീഡിക്സ്, കായ ചികിത്സ ജനറല് മെഡിസിന്’ എന്നീ സ്പെഷ്യാലിറ്റി വിഭാഗങ്ങളാണ് പ്രവര്ത്തനം ആരംഭിക്കുന്നത്. ആശുപത്രിയുടെ നിര്മ്മാണം പൂര്ത്തിയാകുമ്പോള് എല്ലാ സ്പെഷ്യാലിറ്റികളും ഉണ്ടായിരിക്കും.
ഇടുക്കി ആയുര്വേദ മെഡിക്കല് കോളേജിന്റെ ഭാഗമായുള്ള ആശുപത്രി ഒ.പി.ഡി. കോംപ്ലക്സിന്റെ ശിലാ സ്ഥാപനവും ഉടുമ്പഞ്ചോല ഗ്രാമപഞ്ചായത്ത് സൗജന്യമായി വിട്ടുതരുന്ന കമ്മ്യൂണിറ്റി ഹാളില് ഒ.പി. വിഭാഗം പ്രവര്ത്തനാരംഭവും, നാഷണല് ആയുഷ് മിഷന്റെ 66 നിര്മ്മാണ പ്രവൃത്തികളുടെയും ഭാരതീയ ചികിത്സ വകുപ്പിന്റെയും ഹോമിയോപ്പതി വകുപ്പിന്റെയും പദ്ധതി വിഹിതം ഉപയോഗപ്പെടുത്തി പൂര്ത്തിയാക്കിയ 7 നിര്മ്മാണ പ്രവൃത്തികളുടെയും ഉദ്ഘാടനം ഒക്ടോബര് 26ന് ഞായറാഴ്ച ഉച്ചക്കുശേഷം ആരോഗ്യ വകുപ്പ് മന്ത്രി വീണാ ജോര്ജ് നിർവഹിക്കും. ജലവിഭവ വകുപ്പ് മന്ത്രി റോഷി അഗസ്റ്റിന് എം.പി. ഡീന് കുര്യാക്കോസ് എന്നിവർ മുഖ്യാതിഥിയായിരിക്കും.