ന്യൂഡൽഹി: മുസ്ലിം ലീഗ് നേതാവ് കെ.എം. ഷാജിക്ക് വരുന്ന തിരഞ്ഞെടുപ്പുകളിൽ മത്സരിക്കുന്നതിന് തടസ്സമില്ലെന്ന് സുപ്രീം കോടതി. 2016-ലെ അഴീക്കോട് നിയമസഭാ തിരഞ്ഞെടുപ്പിൽ ക്രമക്കേട് നടത്തിയെന്ന് ആരോപിച്ച് ഷാജിയെ ആറ് വർഷത്തേക്ക് അയോഗ്യനാക്കിയ ഹൈക്കോടതി ഉത്തരവ് അധികാര പരിധി മറികടന്നുള്ളതാണെന്ന് സുപ്രീം കോടതി നിരീക്ഷിച്ചു.
സുപ്രീം കോടതിയുടെ പ്രധാന നിരീക്ഷണങ്ങൾ:
അധികാര പരിധി: ജനപ്രാതിനിധ്യ നിയമത്തിലെ 8 (A) വകുപ്പ് പ്രകാരം ഒരു ജനപ്രതിനിധിയെ അയോഗ്യനാക്കാനുള്ള അധികാരം രാഷ്ട്രപതിക്കാണെന്ന് ജസ്റ്റിസുമാരായ ബി.വി. നാഗരത്ന, ഉജ്ജ്വൽ ഭുയാൻ എന്നിവരടങ്ങുന്ന ബെഞ്ച് വ്യക്തമാക്കി. ഹൈക്കോടതി ഇക്കാര്യത്തിൽ അധികാര പരിധി ലംഘിച്ചുവെന്നും കേസ് രാഷ്ട്രപതിക്ക് വിടുകയായിരുന്നു വേണ്ടതെന്നും കോടതി ചൂണ്ടിക്കാട്ടി.
ഹർജിയിലെ പ്രസക്തി: 2016-ലെ നിയമസഭയുടെ കാലാവധി 2021-ൽ അവസാനിച്ച സാഹചര്യത്തിൽ, പഴയ തിരഞ്ഞെടുപ്പ് ഹർജിയിലെ കണ്ടെത്തലുകൾക്ക് ഇനി പ്രസക്തിയില്ലെന്ന് കോടതി വ്യക്തമാക്കി. അതിനാൽ തിരഞ്ഞെടുപ്പ് ക്രമക്കേട് സംബന്ധിച്ച ഹൈക്കോടതി വിധിയിൽ ഇടപെടുന്നില്ലെന്നും കോടതി പറഞ്ഞു.
കോടതിയിലെ കൗതുകം: വാദത്തിനിടെ കെ.എം. ഷാജിക്ക് എത്ര വയസ്സായെന്ന് ജസ്റ്റിസ് നാഗരത്ന ആരാഞ്ഞു. 54 വയസ്സായെന്ന് അഭിഭാഷകൻ മറുപടി നൽകിയപ്പോൾ, “എങ്കിൽ ഇനിയും മത്സരിക്കാമല്ലോ” എന്ന് കോടതി അഭിപ്രായപ്പെട്ടു.
കേസിലെ പശ്ചാത്തലം2016-ലെ തിരഞ്ഞെടുപ്പിൽ മതസ്പർധ വളർത്തുന്ന ലഘുലേഖകൾ വിതരണം ചെയ്തു എന്നാരോപിച്ച് എതിർ സ്ഥാനാർത്ഥിയായിരുന്ന എം.വി. നികേഷ് കുമാറാണ് കോടതിയെ സമീപിച്ചത്. ഇതിന്റെ അടിസ്ഥാനത്തിലായിരുന്നു ഹൈക്കോടതി ഷാജിയെ അയോഗ്യനാക്കിയത്. എന്നാൽ 2021-ലെ തിരഞ്ഞെടുപ്പിൽ ജനങ്ങൾ ഷാജിയെ ശിക്ഷിച്ചുവെന്ന് നികേഷ് കുമാറിന്റെ അഭിഭാഷകൻ കോടതിയിൽ വാദിച്ചു.ഷാജിക്ക് വേണ്ടി സീനിയർ അഭിഭാഷകൻ നിഖിൽ ഗോയൽ, ഹാരിസ് ബീരാൻ എന്നിവരും നികേഷ് കുമാറിന് വേണ്ടി പി.വി. ദിനേശും ഹാജരായി.വിലയിരുത്തൽ: അയോഗ്യത നീങ്ങിയതോടെ വരാനിരിക്കുന്ന നിയമസഭാ തിരഞ്ഞെടുപ്പിൽ കെ.എം. ഷാജിക്ക് സജീവമായി രംഗത്തിറങ്ങാൻ വഴിതെളിഞ്ഞിരിക്കുകയാണ്.