തിരുവനന്തപുരം: ഭക്ഷ്യവകുപ്പിന്റെ ഔദ്യോഗിക വെബ്സൈറ്റ് ഹാക്ക് ചെയ്ത് നൂറ്റിയൻപതോളം വ്യാജ മുൻഗണനാ (പിങ്ക്) റേഷൻ കാർഡുകൾ നിർമിച്ച കേസ് വിജിലൻസ് അന്വേഷിക്കും. അതീവ സുരക്ഷയുള്ള സർ സർക്കാർ സംവിധാനത്തിൽ കടന്നുകയറി തട്ടിപ്പ് നടത്തിയത് ഗൗരവകരമാണെന്ന ഭക്ഷ്യവകുപ്പ് വിജിലൻസ് വിഭാഗത്തിന്റെ റിപ്പോർട്ടിനെ തുടർന്നാണ് മുഖ്യമന്ത്രി അന്വേഷണത്തിന് ഉത്തരവിട്ടത്.
തിരുവനന്തപുരം സൗത്ത് സിറ്റി റേഷനിങ് ഓഫിസിലെ റേഷനിങ് ഇൻസ്പെക്ടർ, ക്ലാർക്ക് എന്നിവരുടെ ലോഗിൻ ഐഡിയും പാസ്വേഡും ചോർത്തിയാണ് റേഷൻ കാർഡ് മാനേജിങ് സിസ്റ്റത്തിൽ (RCMS) തട്ടിപ്പ് നടത്തിയത്.
പ്രതികൾ: ബീമാപള്ളിയിലെ റേഷൻകട ലൈസൻസി സഹദ് ഖാൻ, ഓൺലൈൻ സേവനകേന്ദ്രം നടത്തുന്ന ഹസീബ് ഖാൻ എന്നിവരെ വഞ്ചിയൂർ പൊലീസ് ഇതിനോടകം അറസ്റ്റ് ചെയ്തിട്ടുണ്ട്.
രീതി: ബീമാപള്ളി മേഖലയിലെ നൂറ്റിയൻപതോളം പേരിൽ നിന്ന് പണം വാങ്ങിയാണ് അനർഹരായവർക്ക് മുൻഗണനാ കാർഡുകൾ സംഘടിപ്പിച്ചു നൽകിയത്.നിലവിലെ നടപടി: തട്ടിപ്പിലൂടെ നിർമിച്ച 150 കാർഡുകളും റദ്ദാക്കി. സഹദ് ഖാന്റെ റേഷൻ ലൈസൻസി സസ്പെൻഡ് ചെയ്തു.
ലോഗിൻ വിവരങ്ങൾ ചോർന്നത് എങ്ങനെയെന്ന് ദുരൂഹത
ഉദ്യോഗസ്ഥരുടെ ലോഗിൻ വിവരങ്ങൾ എങ്ങനെ പുറത്തുപോയി എന്നത് സംബന്ധിച്ചാണ് വിജിലൻസ് പ്രധാനമായും അന്വേഷിക്കുക. ഇതിന് പിന്നിൽ വലിയൊരു സംഘം പ്രവർത്തിക്കുന്നുണ്ടോ എന്നും പരിശോധിക്കും. തട്ടിപ്പിന്റെ മുഖ്യ ആസൂത്രകനെ ഇനിയും പിടികൂടാനുണ്ട്.
ബാധിക്കപ്പെട്ടവർ:
വ്യാജ കാർഡുകൾ റദ്ദാക്കിയതോടെ ഇതിൽ ഉൾപ്പെട്ടിരുന്ന അഞ്ഞൂറോളം പേർക്ക് കഴിഞ്ഞ രണ്ട് മാസമായി റേഷൻ മുടങ്ങിയിരിക്കുകയാണ്. വഞ്ചിയൂർ പൊലീസ് അന്വേഷിച്ചിരുന്ന കേസ് ഇനി വിജിലൻസ് ഏറ്റെടുക്കുന്നതോടെ കൂടുതൽ ഉന്നതതല ബന്ധങ്ങൾ പുറത്തുവരുമെന്നാണ് സൂചന.