ന്യൂഡൽഹി: കേരളത്തിലെ ഡിജിറ്റൽ സർവകലാശാല, സാങ്കേതിക സർവകലാശാല (കെ.ടി.യു.) എന്നിവയിലെ സ്ഥിരം വൈസ് ചാൻസലർമാരുടെ (വി.സി.) നിയമന വിഷയത്തിൽ സുപ്രീം കോടതി ഇടപെടൽ. വി.സി. നിയമനത്തിലെ സ്തംഭനാവസ്ഥ തുടരുന്ന സാഹചര്യത്തിൽ, സ്ഥിരം വി.സി.മാരെ നിയമിക്കുന്നതിനായുള്ള പേരുകൾ ശുപാർശ ചെയ്യാൻ ജസ്റ്റിസ് ധൂലിയ കമ്മിറ്റിക്ക് കോടതി നിർദേശം നൽകി.
മുഖ്യമന്ത്രിയും ചാൻസലറുമായുള്ള (ഗവർണർ) തർക്കം കാരണം നിയമനം വൈകുന്നതിലുള്ള അതൃപ്തി കോടതി രേഖപ്പെടുത്തി. മുഖ്യമന്ത്രിയും ചാൻസലറും തമ്മിൽ കത്തുകളുടെ കൈമാറ്റം മാത്രമാണ് നടന്നതെന്നും, സമവായത്തിൽ എത്താൻ കഴിഞ്ഞില്ലെന്നും കോടതി നിരീക്ഷിച്ചു. ചാൻസലർക്ക് കനത്ത തിരിച്ചടിയാണ് ഈ നീക്കം. ജസ്റ്റിസ് ധൂലിയ കമ്മിറ്റി മുമ്പ് തയ്യാറാക്കിയ പാനൽ നിർഭാഗ്യവശാൽ നിയമനത്തിലേക്ക് എത്തിയില്ല. ഇപ്പോൾ നിലവിലെ സ്ഥിതിഗതികൾ കണക്കിലെടുത്ത്, മുഖ്യമന്ത്രിയുടെ കത്തും ചാൻസലറുടെ മറുപടിയും കമ്മിറ്റി ഒരിക്കൽക്കൂടി വിശദമായി പരിശോധിക്കണം.
രണ്ട് സർവകലാശാലകളിലേക്കുമായി, മുൻഗണനാക്രമം അനുസരിച്ച് ഓരോ പേര് വീതം നിർദേശിക്കണം.
ധൂലിയ കമ്മിറ്റി തയ്യാറാക്കുന്ന വിശദമായ റിപ്പോർട്ട് സീൽ ചെയ്ത കവറിൽ സുപ്രീം കോടതിയിൽ സമർപ്പിക്കണം.
റിപ്പോർട്ട് ബുധനാഴ്ചയ്ക്കകം സമർപ്പിക്കണം. കേസ് വ്യാഴാഴ്ച സുപ്രീം കോടതി വീണ്ടും പരിഗണിക്കും.
വി.സി. നിയമനവുമായി ബന്ധപ്പെട്ട് ചാൻസലർ (ഗവർണർ) ഇന്നലെ മന്ത്രിമാരുമായി കൂടിക്കാഴ്ച നടത്തിയിരുന്നു. സിസ തോമസിന്റെ പേരൊഴികെ മറ്റേത് പേര് നിർദേശിച്ചാലും സർക്കാരിന് എതിർപ്പില്ലെന്ന് ചാൻസലറെ അറിയിച്ചതായി സംസ്ഥാന സർക്കാർ കോടതിയെ ബോധിപ്പിച്ചു. എന്നാൽ, നിലവിലെ താൽക്കാലിക വി.സി.യെ ചാൻസലർ പിന്തുണയ്ക്കുന്നുവെന്നും, ഈ വ്യക്തിയുടെ നിയമനം സർവകലാശാലാ പ്രവർത്തനങ്ങളെ തുടർച്ചയായി തടസ്സപ്പെടുത്തിയെന്നും സർക്കാർ കോടതിയെ അറിയിച്ചു.